Foto: Túrkistan oblysy ákiminiń baspasóz qyzmeti
1 qazan – Halyqaralyq qarttar kúni merekesinde Túrkistan oblysy, Qazyǵurt aýdanynyń qorǵanys isteri jónindegi bóliminiń basshylyǵy aýdannyń qurmetti turǵyny, Uly Otan soǵysynyń ardageri Anarbai Myrzahmetovti quttyqtady, dep habarlaidy «Ult aqparat».
– Aǵa býyn salt-dástúrlerdiń tálimgerleri men saqtaýshylary bola otyryp, bizge úlgi bolady. Olardyń árbir sózi, esteligi jáne dana keńesi – baǵa jetpes bailyq. Biz olarmen árqashan bailanystamyz. Bizdiń kishigirim kómegimiz, olardyń densaýlyǵyna, kóńil kúiine jaqsy jaǵynan áser eterine senemiz, – dedi Qazyǵurt aýdany qorǵanys isteri bóliminiń bastyǵy, maior Baǵlan Órisbai.
Qarabaý aýyldyq okrýginiń Syntas aýylynyń tiri ańyzy, Anarbai Myrzahmetov jubaiy Shamenmen jáne ulynyń otbasymen birge Báidibek kóshesi, 56-úide turady. 1944 jyly 18 jastaǵy Anarbai óz erkimen soǵysqa ketti. Berlindi alýǵa qatysyp, sol qalada kópten kútken jeńisti qarsy aldy. Onyń marapattarynyń arasynda «Berlindi alǵany úshin», «1941-1945 jyldardaǵy Uly Otan soǵysyndaǵy Germaniiany jeńgeni úshin» jáne t.b. medaldary bar.
1950 jyly, Anarbai Myrzahmetov áskerden úiine oraldy. Týǵan aýylynyń Shamen esimdi 18 jasar qyzyna úilendi. Mal sharýashylyǵynda eńbek etti. Qoi fermasyn basqardy jáne beibit ómirde jetistikterge jetti.
Biyl Anarbai Myrzahmetuly 96 jasqa toldy, al úiindegi ájemiz 92 jasta. Olar birge 74 jyl boldy. On ul men qyz ósirip, solardyń 43 nemeresiniń tárbiesine belsene qatysyp keledi.
Sonymen qatar, Sairam aýdanynyń ákimi Arman Sábitov birqatar basshylyq qurammen birge 1 qazan – Halyqaralyq qarttar kúni merekesi qarsańynda jasy 100-den asqan Aqbulaq aýylynyń turǵyny Qyzylkúl Qýandyqovany tól merekesimen quttyqtap, shańyraǵyna arnaiy bardy.
– Sizdiń árbir júrip ótken ómir jolyńyz óskeleń urpaq úshin óshpes ónege. Mine, búginde eńbegińizdiń zeinetin kórip otyrǵan shaqta da urpaqtaryńyzǵa izgi isterdiń jarqyn úlgisin kórsetip kelesiz. Qashanda shańyraǵyńyzdyń uiytqysy bolyp, shattyqtyń sáýlesin sebe berińiz. Otbasyńyzǵa bereke, birlik tileimin! – dedi aýdan basshysy A. Sábituly.
Ǵasyr kýási atanǵan asyl anamyzǵa aýdan ákimi óziniń atynan arnaiy quttyqtaý haty men syilyqtaryn tabystap, iyǵyna aq jaýlyq japty. Óz kezeginde, júz jasaǵan ana búgingi jas býynnyń ózine kórsetip jatqan syi-qurmetine analyq aqjarma tilegin arnady. Aýdandy alǵa damytý jolyndaǵy jańa bastamalaryna sáttilik tilep, aq batasyn berdi.
