Foto: Gov.kz
Qoja Ahmet Iasaýi atyndaǵy qazaq-túrik ýniversitetinde qazaqtyń birtýar azamaty, ultymyzdyń asa kórnekti qairatkeri Nurtas Ońdasynovtyń týǵanyna 120 jyl tolýyna arnalǵan «Qazaqstan jáne Nurtas Ońdasynov qubylysy: Mádeni taldaý aspektisi» atty respýblikalyq ǵylymi-tájiribelik konferentsiiasynyń ashylý saltanaty ótti, dep habarlaidy Ult.kz.
Respýblika kúni qarsańynda QR Túrkistan oblysynyń ákimdigi, Qoja Ahmet Iasaýi atyndaǵy halyqaralyq qazaq-túrik ýniversiteti, «Nurtas Ońdasynov» qoǵamdyq qorynyń qoldaýymyn ótken sharany ýniversitet rektory Janar Temirbekova júrgizip, QR Prezidenti Qasym-Jomart Toqaevtyń quttyqtaý hatyn oqyp berdi.
Is-sharaǵa Túrkistan oblysy ákiminiń orynbasary Ertai Altaev qatysyp, qairatkerdiń ekonomikany, ǵylymdy damytý úshin atqarǵan ólsheýsiz qyzmetine toqtalyp, ultqa eńbegi sińgen uly tulǵalardyń murasyn nasihattaý igi is ekenin jetkizdi.
– Aldyman barshańyzdy kele jatqan Respýblika kúnimen shyn júrekten quttyqtaimyn! Biyl ultymyzdyń asa kórnekti qairatkeri, el basyna kún týǵan shaqta, asa qiyn kezde el basqarǵan, qairatkerlik tanytqan Nurtas Ońdasynovtyń týǵanyna 120 jyl tolyp otyr. Osy aitýly sátte Nurtas Dándibaiulynyń týǵan jeri, Túrki áleminiń tóri – Túrkistanda sizdermen júzdesip turǵanyma qýanyshtymyn. Túrkistannyń oishyly, Túrki álemine ortaq tulǵa Qoja Ahmet Iasaýidiń «Halqyńa qyzmet et, Izgilerge izet et, Jany jaqsy jaisańdarǵa qurmet et!» degen qanatty sózi bar. Nurtas Dándibaiuly osy qurmetke barynsha sai tulǵa. Kieli Túrkistan óńirinde el azamatynyń esimi ulyqtalyp keledi. Tulǵanyń atynda mýzei bar, bilim uiasyna, kóshege esimi berilgen. Qairatkerdiń eńbegi máńgi el esinde qalady. Búgingi konferentsiiada ǵalymdarymyz, ziialy qaýym ókilderi tulǵanyń saiasi, rýhani, tarihi bolmysyn ashyp, tyń derekter tarihi aitylady dep senemin! – dedi oblys ákiminiń orynbasary Ertai Kenjebekuly.
Atalǵan sharaǵa elimizge tanymal qoǵam qairatkerleri, jazýshy, ǵalymdar, tarihshylar, ardagerler, máslihat depýtattary, ziialy qaýym ókilderi, belsendi jastar jinaldy.
Aýqymda is-sharada QR Parlamenti Májilisiniń depýtaty, Halyqaralyq «Alash» syilyǵynyń laýreaty, aqyn Qazybek Isa, Jazýshylar odaǵynyń múshesi, «ońdasynovtanýshy» Gúlsim Orazaliev jáne taǵy basqa spikerler sóz sóilep, Nurtas Ońdasynovtyń tulǵalyq jáne kásibi qasietterine, keleshek urpaqqa qaldyrǵan mol murasynyń qundylyǵyna toqtaldy.
Sonymen qatar shara barysynda Nurtas Ońdasynovtyń ómir joly, el úshin aianbai atqarǵan qyzmetteri, Qazaqstannyń áleýmettik-ekonomikalyq damýyna qosqan úlesi, eren eńbegi týraly baiandamalar oqyldy.
Konferentsiia aldymen jalpy plenarlyq otyrystan bastalyp, ári qarai 4 sektsiia boiynsha jalǵasyp jatyr.
Plenarlyq otyrystan soń, Mádeniet ortalyǵynyń alańyna shynar aǵashyn otyrǵyzý rásimi uiymdastyryldy.
Qonaqtar shara sońynda Túrkistan qalasynyń týristik oryndaryn aralap, qalanyń damý barysymen, sáýletimen tanysady.
