Foto: okg.kz
Qoǵamnan óz ornyn taýyp, adal eńbegimen el qurmetine bólenip júrgen azamattar aramyzda az emes. Taiaýda kóptiń arasynda kózge jii túse bermeitin, biraq, ainalasy erekshe qurmet tutatyn besaspap janmen tildesken edik.
Tilesbai Jumabai 1947 jyly Ordabasy aýdany, Bógen aýylynda dúniege kelgen. Tekti urpaqtyń murageri. Arǵy atasy Jumabai Bimenuly – osy aýylda alǵash ret mektep ashqan ziialy adam. Al, ákesi Ámzebai uzaq jyldar boiy ustazdyq etti. Ómirlik qosaǵy Ziiash ekeýi 13 ul-qyzdy tárbielep ósirdi. Perzentteriniń bári joǵary bilim alyp, elimizdiń órkendep, nyǵaiýy jolynda ter tógýde.
Osy Ámzebai men Ziiashtyń tuńǵyshy Tilesbai eńbekpen erte eseidi. Kámelet jasqa tolmai-aq Bógen avtobazasynda slesar-jóndeýshi bolyp jumys istedi. Otan aldyndaǵy boryshyn ótedi. 1970 jyly arnaiy mehanizatorlyq kýrsta oqyp, kótergish kran mashinisi mamandyǵyn igerdi. Bul sharýashylyq úshin taptyrmas kadr edi. Ekiniń biriniń qolynan kele bermeitin kásipti ilkimdiliginiń arqasynda tez igerip ketti. 1980 jylǵa deiin kótergish krannyń rólinde otyryp, san-salaly jumystardy atqardy. Jastyq shaqta adam ár nársege áýes keledi ǵoi. Tilesbai jastaiynan fotoapparatpen sýret túsirýge qumartyp, arnaiy kýrs ta oqydy. Sóitip, aýdandyq halyqqa qyzmet kórsetý ortalyǵynda 19 jyl eńbek etip, kópshiliktiń súiispenshiligine bólendi.
Sharýashylyqtyń san-salasynan habary mol azamat únemi izdeniste júretin. Sonyń nátijesinde 1993 jyly Bógen aýylynda «Kóltoǵan» sharýa qojalyǵyn uiymdastyryp, ózine tiemeldi sýarmaly jerine alma men júzim kóshetterin otyrǵyzdy. Budan basqa jyl saiyn maqta, júgeri, jońyshqa egip, ujym músheleri tabysqa keneldi. 2005 jyly Arys aýdanyna qarasty kórshiles Sanaly aýylynan da «Kóltoǵan» atty sharýa qojalyǵyn ashty. Jaiylymda asyl tuqymdy qoi ósirýde. Osylai mal semirtýdiń de sheberi atandy. Mal sanyn kóbeitýmen qatar, memleketke semiz et ótkizedi. 2005 jyldan beri Bógen kólinde shabaq ósirip, «Dariia balyq» JShS-ne basshylyq etýde. On shaqty jandy jumyspen qamtyp otyr. Tilesbai Ámzebaiuly osylaisha 3 salany qatar igerip, el bailyǵyn arttyrýmen birge eńbekkerlerdiń de áleýetin kóterip júr. Tabys ońailyqpen kelmeidi.
Jumysshylaryn eńbekke baýlyp basqarý bir bólek te, balyqtyń jemin taýyp berý, ýaqtyly azyqtandyrý, mindetine alǵan taýardy der kezinde tiisti mekemege daiyndap jetkizip berý, tapsyrysty minsiz oryndaý siiaqty jumystardy sheber úilestirip, eńbekti durys uiymdastyrýdyń, durys basshylyq etýdiń nátijesinde tolaǵai tabystarǵa jetip júr. Odan bólek, ózge áriptesterimen jii tájiribe almasady, túrli kórmege baryp qaitady. Onyń da tiimdi jaqtary mol.
Besaspap maman osylai tynymsyz eńbegimen abyroiǵa bólenip, kóptegen marapat iesi atandy. Onyń tósbelgi men medaldaryn tizbelesek, qaǵaz jetpesi anyq. Salany damytý, sapany jaqsartý boiynsha da kóshbasshy atanǵan azamat halyqaralyq syilyqtar men birneshe diplom iegeri. T.Jumabai 2019 jyly «Eren eńbegi úshin» medalimen marapattaldy. Ol Arys qalasynyń jáne Ordabasy aýdanynyń qurmetti azamaty.
Eńbekqor jan zaiyby – Qazaqstan bilim berý isiniń úzdigi, Batyr ana Bibaisha Álisher-
qyzy ekeýi 7 ul, 3 qyz tárbielep, 40 nemere, 7 shóbereniń qyzyǵyn kórýde.
Berkinbek JAQYPULY,
Qazaqstan Jýrnalister odaǵynyń múshesi.
Ordabasy aýdany.
