Eń tómengi zeinetaqy men járdemaqy standarttary qaita qaralady. Bul týraly Eńbek jáne halyqty áleýmettik qorǵaý ministri Tamara Dúisenova aitty, dep habarlaidy QazAqparat.
«Biyl sáýir aiynda áleýmettik sala shyǵyndary qosymsha 4%-ǵa indeksteldi. Sonda 40-50 myń teńge kólemindegi zeinetaqy 2 myń teńgege ǵana ósse, 300-400 myń teńgedegi zeinetaqy 16 myńǵa ósken. Bul teńsizdikti qalai azaitpaq? Bul qarajat eń tómen zeinetaqy men 1 millionǵa jýyq adamnyń tabysynyń eń tómengi kúngóris deńgeiin kóterýge qanshalyqty múmkindik beredi? Jalpy, indeksteýden keiin azamattar tólemderdiń ósýin barynsha seziný úshin eń tómengi áleýmettik standarttar ádisnamasyn qaita qaraý ministrliktiń josparynda bar ma?», - dep suraq qoidy Senat depýtaty Rysqali Ábdikerov ministrge.
Óz kezeginde Tamara Dúisenova zeinetaqy jáne basqa áleýmettik tólemderdi indeksatsiialaý infliatsiia dálizine qarai biýdjettik tártippen jasalatynyn jetkizdi.
«Eń tómengi zeinetaqy, eńbekaqy, járdemaqy jónindegi sizdiń pikirińizmen tolyq kelisemin. Sondyqtan Úkimettiń qazirgi josparynyń ishinde bizdiń de on shaqty josparymyz tur. Eń tómengi zeinetaqydan eń tómengi járdemaqyǵa deiingi standarttardy qaita qaraimyz. Qazir biz ulttyq jáne halyqaralyq sarapshylardy shaqyryp, jumysty bastadyq. Biraz usynystarymyzdy daiarlap jatyrmyz. Sonyń nátijesinde jumys toby qurylady dep otyrmyz. Sol jumys tobyna ózderińizdi de shaqyramyz», - dedi ol.
Ministr shyn máninde problema bar ekenin moiyndaidy.
«Problema bar. Búginde eń tómengi, ortasha jáne joǵary zeinetaqy arasynda úlken aiyrmashylyq paida boldy. Al eń tómengi áleýmettik standarttardy qaita qaraý arqyly osy aiyrmashylyqty jóndeimiz», - dedi Dúisenova.
