Elimizde jalaqynyń tómengi mólsherin arttyrý maqsatynda arnaiy Jol kartasy ázirlenedi. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Eń tómen áleýmettik standarttar jáne olardyń kepildikteri týraly» Qazaqstan Respýblikasy Zańynyń 11-babyna sáikes eń tómengi jalaqy eńbek salasyndaǵy eń tómen áleýmettik standarttardyń biri bolyp tabylady. Ol Eńbek kodeksiniń 104-babyna sáikes tiisti qarjy jylyna arnalǵan respýblikalyq biýdjet týraly Qazaqstan Respýblikasynyń zańymen jyl saiyn belgilenedi jáne eń tómengi kúnkóris deńgeiinen kem bolmaýǵa tiis. 2019 jyldyń 1 qańtarynan bastap jalaqynyń tómengi mólsheri 1,5 esege (28 284 teńgeden 42 500 teńgege deiin) arttyryldy, bul maqsatqa respýblikalyq biýdjetten qosymsha 259 mlrd teńge bólindi jáne tutastai alǵanda halyqtyń ortasha jalaqy mólsherine oń áserin tigizdi», - dedi Úkimet basshysy.
Onyń atap ótýinshe, jalaqynyń tómengi mólsherin arttyrý maqsatynda arnaiy Jol kartasy ázirlenedi. Onyń aiasynda eńbekaqynyń tómengi mólsherin arttyrýdyń negizgi tásilderi men tetikteri zerdelenip, eń tómengi jalaqyny belgileý ádistemesi jetildiriledi.
«Jalaqynyń tómengi mólsherin arttyrý respýblikalyq biýdjetten qosymsha shyǵystardy talap etedi. Osyǵan bailanysty bul másele eldegi ekonomikalyq jaǵdaiǵa jáne memlekettik biýdjettiń naqty múmkindikterine qarai qaralatyn bolady. Qazirgi ýaqytta Úkimet eldiń makroekonomikasyna jalaqynyń eń tómengi mólsherin arttyrýdyń áserin baǵalaýǵa bailanysty zerdeleý júrgizýde jáne onyń nátijesinde Qazaqstan Respýblikasy azamattarynyń ál-aýqatyn arttyrýǵa baǵyttalǵan qajetti sharalar qabyldanatyn bolady», - dedi Asqar Mamin.
