Almaty oblysynyń politsiiasy halyq emshisin 28 jastaǵy azamattyń ólimine kúdikti retinde qamaýǵa aldy. Bul týraly "Ult aqparat" oblystyq Politsiia departamentiniń baspasóz qyzmetine silteme jasap habarlaidy.
Kisi ólimi týraly fakt 12 qańtarda Qarasai aýdanynda tirkelgen. Sot-meditsinalyq saraptama barysynda 28 jastaǵy azamattyń keýde tusynan qatty jabyq jaraqat alǵany, birneshe qabyrǵalarynyń synǵany jáne ókpesiniń zaqymdanǵany anyqtalǵan. Osy aýyr jaraqattar kisi ólimine sebep bolýy múmkin.
Atalǵan fakti boiynsha is qozǵaǵan politsiia kisi ólimine kúdikti retinde jergilikti emshini ustady.
«Marqumnyń týystary tarapynan politsiiaǵa resmi aryz áli túsken joq. Degenmen, oqiǵa boiynsha QR Qylmystyq kodeksiniń 3 bólimi, 106 baby boiynsha (Kisi ólimine ákep soǵatyn densaýlyqqa qasaqana aýyr zalal keltirý) sotqa deiingi tergeý júrgizilýde. Kúdikti retinde dástúrli emes meditsinamen ainalysatyn 63 jastaǵy azamat ustaldy», - delingen oblystyq politsiia departamentiniń baspasóz baianynda.
Belgili bolǵanyndai, marqumdy emshige týystary ákelgen. Olar jas jigittiń ishinde jyn bar dep oilaǵan. Marqum bolǵan jigit sońǵy úsh jyldan beri naýqas eken.
Emshi jigittiń boiynan jyndy shyǵaramyn dep bes kún boiy «emdegen». Osynyń saldary kisi ólimine soqtyrǵan bolýy múmkin.
«Sotqa deiingi tergeýmen Qarasai aýdandyq politsiia qyzmetkerleri ainalysýda. Ustalǵan emshi qazir ýaqytsha oqshaýlaý izoliatorynda qamaldy», - delingen baspasóz qyzmeti taratqan aqparatta.
