Foto: ánshiniń Instagram paraqshasynan
Mádeniet jáne aqparat ministri Aida Balaeva ánshi Áli Oqapovtyń áleýmettik jelidegi synnan keiin "Qurmet" ordenin qaitaramyn degen málimdemesine qatysty pikir bildirdi, dep habarlaidy "Ult aqparat" Sputnik Qazaqstan saityna silteme jasap.
Ministr ánshimen jeke sóilesken.
"Ol kisi shyǵarmashylyq adamy bolǵannan keiin bárin emotsionaldy turǵyda qabyldaǵan. Ol maǵan: "Aida Ǵalymqyzy, shynymen de bári jan-jaqtan talaǵan kezde, meniń eńbegim emes dep, anammen salystyryp jatqannan keiin shydai almadym" dedi. Qazir ondai suraq joq. Barlyǵy durys", - dedi Balaeva májilis kýlýarynda jýrnalister suraǵyna jaýap berip.
"Iaǵni, "Qurmet" ordeni ánshide qalady ǵoi?" dep naqtylaǵan suraqqa:
"Iá, ózinde qalady", - dep jaýap berdi ministr.
Vedomstvo basshysy jalpy memlekettik marapattardy qaitarýǵa bolmaitynyn atap ótti.
"Bul durys emes. Áli Oqapov áleýmettik jelidegi pikirlerdi júregine jaqyn qabyldaǵan. Bir qyzyǵy, bizde qazir barlyq máselege pikir bildiretin sarapshylar kóbeiip ketti. Bulai isteýge bolmaidy. Sol sebepti biz Áli Oqapovpen sóilestik", - dedi ol.
Buǵan deiin Roza Rymbaevanyń uly áleýmettik jelidegi teris pikirlerden keiin "Qurmet" ordeninen bas tartqan bolatyn. Keibireýler ony tek týystyq bailanysy úshin ǵana marapat aldy dep eseptegen.
