Qazaqstannyń Oskar komitetiniń sheshimimen Emir Baiǵazinniń «Ómir» filmi «Shet tilindegi úzdik film» nominatsiiasy boiynsha amerikalyq kinoóner akademiiasynyń «Oskar» syilyǵyna usynyldy, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Baiǵazinniń jańa kartinasynyń álemdik premerasy bedeldi Toronto kinofestivaliniń «Zamanaýi álemdik kino» sektsiiasynda ótti.
95-shi ret beriletin amerikalyq kinoakademiia syilyǵyna úmitkerlerdiń tizimi 2023 jylǵy 24 qańtarda jariialanady. Rásimniń ózi 2023 jylǵy 12 naýryzda ótedi.
Aita keteiik, film úsh jyl boiy Almatyda, Túrkistan oblysynda, Aqtaýda jáne Tailandta túsirilgen. Basty róldi Erkebulan Tasynov somdaǵan. Baiǵazinniń ózi stsenarist, rejisser, operator, prodiýser qyzmetterin atqardy.
«Bul filmniń ideiasy men tarihy osydan týra on jyl buryn alǵashqy filmimdi túsirýge daiyndalyp júrgenimde keldi. Keiipkerdiń basynan ótken qiyndyqtarǵa qaramastan, men bul oqiǵany ómirge degen súiispenshilikke toly dep sanadym», - dedi rejisser.
Emir 2013 jyly túrli festivalderde 25-ten astam júlde alǵan «Úndestik sabaqtary» filmimen álemdik kino sahnasyna shyqty. Solardyń ishinde Berlin kinofestivalinde Qazaqstan úshin tuńǵysh ret «Kúmis aiý» boldy. Odan keiin «Jaraly perishte» men Batys jurtshylyǵy jaqsy kóretin «Ózen» shyqty. Ol filmniń álemdik tusaýkeseri 75-shi Venetsiia kinofestivaliniń «Kókjiek» baǵdarlamasynda ótip, Baiǵazin «Úzdik rejisser» atandy.
