Foto: baigenews.kz
Astana qalalyq apelliatsiia sotynyń sýdiasy Aibek Ámirǵaliev Densaýlyq saqtaý eks-ministri Eljan Birtanovtyń isi boiynsha apelliatsiialyq shaǵymdy qaraý protsesin 27 jeltoqsanǵa qaldyrdy, dep habarlaidy QazAqparat.
«Úshinshi sýdianyń aýrýhanada bolýyna bailanysty búgin sot quramy tolyq emes. Tiisinshe, qazir isti qaraýdy bastai almaimyz. Sondyqtan ony 27 jeltoqsan saǵat 15:00-den bastap jumys kúniniń sońyna deiin qaraimyz. Jalǵasy 28 jeltoqsan saǵat 10:00-15:00 aralyǵynda bolady», - dedi sýdia Aibek Ámirǵaliev.
Al buǵan qatysty pikir bildirgen Eljan Birtanovtyń ózi shaǵymdy qaraý ýaqyty ózgeretinin kútpegenin aitty.
«Árine, biz apelliatsiialyq shaǵymdy qaraý ýaqyty ózgeredi dep oilaǵan joqpyz. Shynymdy aitsam, men ózimdi sottalǵan adam dep sanamaimyn. Úkim aiyptaý aktisinen kóshirip jazylǵan. Bir jyl ishinde aitylǵan dálelderdi sýdia Álkenov múldem elemedi. Sondyqtan úkimdi kútip, oǵan daiyndalý úshin biraz ýaqyt qajet boldy. Bizdiń oiymyzsha, úkimde faktiler birjaqty burmalanǵan. Ár advokattyń óz kózqarasyn aitýǵa quqyǵy bar. Apelliatsiialyq sot tyńdaidy dep úmittenemiz», - dedi Eljan Birtanov.
Aita keteiik, 28 qazanda Eljan Birtanovtyń isine qatysty sot úkimi shyqqan edi. Keiin ol bul sheshimmen kelispeitinin aityp, shaǵym túsiretinin málimdegenbolatyn.
