Búgin Astana qalasy Saryarqa aýdanynyń №2 sotynda eks-ministr Eljan Birtanov pen onyń burynǵy orynbasary Oljas Ábishevtiń isine qatysty úkim shyǵaryldy, dep habarlaidy "Ult aqparat".
Úkim «Zoom» platformasynda onlain rejimde oqyldy.
«QR QK 361-baby 4-bóligi 3-tarmaǵynda kózdelgen qylmystyq quqyqbuzýshylyq jasaǵany úshin Eljan Birtanov pen Oljas Ábishev kináli dep tanylsyn jáne osy bap boiynsha Birtanovqa bes jyl merzimge bas bostandyǵyn shekteý túrindegi jaza, Ábishevke 4 jyl merzimge bas bostandyǵyn shekteý túrindegi jaza taǵaiyndalsyn», - dedi sýdia Ibragim Álkenov.
Birtanov sanaviatsiia bortyn zańsyz paidalandy degen aiyp boiynsha aqtaldy.
Aita keteiik, buǵan deiin prokýror eks-ministrdi Qylmystyq kodekstiń 361-babynyń 4-bóligi 3-tarmaǵynda (Laýazymdyq ókilettikterdi teris paidalaný, aýyr saldarǵa alyp kelgen áreket) kózdelgen qylmysty jasaǵany úshin kináli dep tanyp, 6 jylǵa bas bostandyǵynan aiyrýdy suraǵan bolatyn.
Sondai-aq, Birtanov pen onyń orynbasary Oljas Ábishevten 1 milliard 548 million 136 myń 575 teńgeni teń úlespen óndirýdi, al Birtanovtan sanitarlyq aviatsiiany paidalanǵany úshin jumsalǵan 5 million 503 myń 721 teńgeni óndirip alýdy usyndy. Oǵan qosa, prokýror memlekettik qyzmette jumys isteýge ómir boiyna tyiym salý qajet dep sanaidy.
Ábishev jyl saiyn 100 saǵattyq qoǵamdyq jumystarǵa tartylady. Ekeýiniń úiqamaqta otyrǵan merzimi de esepteledi.
Densaýlyq saqtaý ministrliginiń azamattyq aryzy jartylai qanaǵattandaryldy. Birtanov pen Ábishev 1 milliard 350 million 123 myń teńge kólemindegi materialdyq shyǵyndy ótep berýge mindetteldi. Birtanovty "Qurmet" ordeninen aiyrýǵa usynys jasalady.
Eske salaiyq, Birtanov 2020 jyldyń 25 maýsymynda qyzmetinen bosatyldy. Densaýlyq saqtaý ministrliginiń burynǵy basshysy 2020 jyldyń qarashasynan beri úiqamaqta otyr.
Eks-ministr men burynǵy vitse-ministr Oljas Ábishev Densaýlyq saqtaý ministrliginiń jumys istemeitin aqparattandyrý platformasyn qabyldap, iske qosý arqyly qyzmet babyn asyra paidalandy degen kúdikke ilingen. Advokattyń aitýynsha, quqyq qorǵaý organdary is boiynsha bapty qaita saralaǵan.
11 qazanda Birtanov pen Ábishevke qatysty is boiynsha tergeý aiaqtalǵan bolatyn.
