Densaýlyq saqtaý ministri Eljan Birtanov halyqqa ekpe jasaýǵa qatysty taǵy da pikir bildirdi, dep habarlaidy "Ult aqparat".
«Vaktsinatsiialaý – qazirgi Kodeks pen jańa Kodeks jobasy boiynsha kez kelgen adamǵa kelisimi arqyly ǵana (nemese zańdy ókiliniń kelisimi – balanyń ata-anasy) jasalady. Kez kelgen adam (ata-ana) odan bas tarta alady. Ol májbúrli emes. Áitse de halyqty vaktsinatsiialaý – infektsiia epidemiiasynan halyqtyń qorǵaýdyń birden-bir ǵylymi negizge ie ári dáleldengen amaly. Bul memlekettik densaýlyq saqtaýdyń mindetti sharasy», - dep jazdy Eljan Birtanov Facebook paraqshasynda.
Ministr «eger vaktsinatsiia mindetti bolmaityn bolsa – perzenthanalar men aýrýhanalardyń dárigerleri úshin mindetti bolmaitynyn» jetkizdi.
«Bizge bul vaktsinalardy satyp alý kerek bolmai qalady. Jylyna 4 millionnan astam balaǵa týǵan kezde jáne týǵannan keiin memleket esebinen poliomielit, týberkýlez, sirespe, qyzylsha, kókjótel, gepatit, pnevmoniiaǵa qarsy ekpe jasalmaidy», - dep túidi Eljan Birtanov.
Aita keterligi, Parlament Májilisiniń depýtattary «Qazaqstan Respýblikasynyń densaýlyq saqtaý máseleleri boiynsha keibir zańnamalyq aktilerge ózgerister men tolyqtyrýlar engizý týraly» zań jobasyn maquldaǵan bolatyn. Izinshe ekpelerdiń bárin de mindetti jáne erikti dep ekige bólý týraly sheshim qabyldandy.
