QR Densaýlyq saqtaý ministri Eljan Birtanov elordadaǵy travmatologiia jáne ortopediia ǵylymi-zertteý institýtyna baryp, ushaq apatynan jaraqat alǵan naýqastyń kóńilin surap qaitty, dep habarlaidy "Ult aqparat" ministrdiń Facebook paraqshasyna silteme jasap.
«Búgin tańerteń elordadaǵy travmatologiia jáne ortopediia ǵylymi-zertteý institýtyna bardym. Ortalyqta Almaty mańyndaǵy ushaq apatynynan zardap shekken adam jatyr. Ol keshe saǵat 14:40-ta sanaviatsiiamen jetkizildi», - dep jazdy Eljan Birtanov.
Onyń aitýynsha, zardap shekken áieldiń jaǵdaiy ortasha aýyr, kóp jaraqat alǵan jáne kóp qan joǵaltqan.
«Onyń ómirine qaýip tónip turǵan joq. Ortalyq mamandary barlyq qajetti tekserýden ótkizip, ota jasaýǵa daiyndady. Ulttyq travmatologiia jáne ortopediia ortalyǵynyń direktory, professor Nurlan Batpenovtyń qatysýymen ota arqyly emdeýdiń birinshi kezeńi júzege asty. Qazirgi ýaqytta NIIITO direktory, professor Nurlan Batpenovtyń qatysýymen ota jasaý arqyly emdeýdiń birinshi kezeńi júzege asty», - deidi ministr.
Ushaq apatynan zardap shekkenderdiń barlyǵyna qajetti em kórsetilgenin aita ketý kerek.
«Oǵan respýblikalyq ǵylymi-zertteý institýttar men ortalyqtardyń úzdik mamandary tartyldy. Zardap shekkenderdiń jaǵdaiy meniń jeke baqylaýymda», - deidi ol.
Sondai-aq, ministr atalmysh ortalyqtyń jansaqtaý jáne intensivti terapiia bóliminde aýyr jaǵdaida jatqan taǵy eki naýqastyń emdeý kezeńimen tanysqan.
«Onyń biri - jol apatynan jaraqat alǵan 1961 jylǵy áiel. Ol ortalyqqa sanaviatsiiamen jetkizilgen. Naýqastyń jaǵdaiy ortasha aýyr, jaqsarý úrdisi baiqalady. Reanimatsiiadan mamandandyrylǵan bólimge aýystyrý josparlanyp jatyr. Jambas súiekterine ota jasalady. Úshinshi naýqas - 2019 jyldyń 29 jeltoqsanynda óte aýyr jaǵdaida aýrýhanaǵa túsken. Ol da jol-kólik oqiǵasynan jaraqat alǵan. Qarqyndy terapiia júrgiziledi», - dep jazdy Eljan Birtanov Facebook paraqshasyna.
