QR Densaýlyq saqtaý ministri Eljan Birtanov naýqastarǵa tegin beriletin dár-dármektiń satylymǵa shyǵarylýymen kúres qalai júrgizilip jatqanyn aitty, dep habarlaidy QazAqparat.
«Bizde tegin dári-dármek 2005 jyldan bastap beriledi jáne jyl saiyn onyń tizimin keńeitip jatyrmyz. Memleket qosymsha qarjy da bóledi. Eń mańyzdy másele - osy tegin dári-dármektiń ár naýqasqa tikelei jetýi. Biz ony baqylaýda ustaýǵa tiispiz. Ótken jyldary kóptegen naýqas adam bizge habarlasyp, tegin dárilerdi ala almaǵandyqtaryn nemese uzaq kútetindikterin aitqan edi. Onyń sebebi josparlaýǵa bailanysty boldy. Aitalyq, arterialdyq gipertenziiamen aýyratyn 30 myńnan astam adamǵa dári-dármekti josparly túrde satyp alý úshin biz tikelei naýqastardan aqparat bilýimiz qajet edi», - dedi ministr búgin BAQ ókilderimen kezdesýi barysynda.
Onyń aitýynsha, 2015-2016 jyldary syrqat jandardan qajetti aqparattardy jinaý qaǵaz túrinde júrgizildi. Al bul kezeginde qajetti tegin dári-dármekti satyp alý josparynyń orynalýyna kedergi keltirip otyrdy. Sondyqtan salaǵa tsifrlandyrý júrgizilip, sozylmaly aýrýlarmen aýyratyn adamdar arnaiy tizimge alyndy. Bul jumys 2018 jyly tolyq aiaqtaldy. Al 2019 jyldan bastap sol tizim arqyly ǵana dárigerdiń retseptimen tegin dári-dármekter naýqastarǵa berile bastady.
«Ótken jyly osy tegin beriletin dáriler jeke dárihanalardan nemese shetelden tabyldy. Biz muny ózimiz anyqtap, quqyq qorǵaý organdaryna, Bas prokýratýraǵa bergenbiz. Osy fakti boiynsha 28 qylmystyq is qozǵaldy. Ótken jyldyń jeltoqsan aiynda Shymkent qalasy men Túrkistan oblysynda birneshe meditsialyq qyzmetker osyndai qylmyspen ustalyp, sharalar qabyldandy. Degenmen, muny baqylaýǵa kelgende birqatar qiyndyq bar. Qazirgi zańǵa sáikes bizdiń memlekettik organdar, máselen farmatsiia qyzmetkerleri, inspektorlar jeke dárihanalardy, klinikalardy teksere almaidy. Sondyqtan qazir kodekske arnaiy normalar engizip jatyrmyz. Mysaly, azamattardyń densaýlyǵyna bailanysty memlekettik baqylaý múmkindigin keńeitý, dári-dármektiń sapasyn, baǵasyn jáne jetkilikti ekendigin baqylaý úshin múmkindik jasaý kózdelip otyr», - dedi Eljan Birtanov.
