Elordada QR Densaýlyq saqtaý ministrligi 2019 jyldyń alǵashqy jartyjyldyǵynyń qorytyndysy boiynsha alqa otyrysyn ótkizdi, dep habarlaidy QazAqparat.
Otyrysta QR Densaýlyq saqtaý ministri Eljan Birtanov óńirlerdegi ólim-jitim máselesin kóterdi.
«Aqsha eshqashan jetpeidi. Biz jalpy ólim-jitim jóninde qarjylandyrý, ekologiia jáne tártip jaǵdailarynyń toǵysýy retinde aityp otyrmyz. Qarajat kóp adamdarǵa jetpei otyr.
Ministrlikpen, áleýmettik meditsinalyq saqtandyrý qorymen jumys istep, qarajat kólemin muqtaj jaqqa aýdarý qajet. Ekinshiden, mamandar óz jumysyna durys ekpin qoiýy tiis... Memlekettik baǵdarlamada aýrýdyń aldyn alý sharalaryn damytýǵa jáne basymdyq berilgen», - dedi ministr QR Densaýlyq saqtaý ministrliginde ótken alqa otyrysynda.
Sonymen birge, óńirlik densaýlyq saqtaý basqarmalary jalpy ólim-jitim kórsetkishteri boiynsha esep berdi. Mańǵystaý densaýlyq saqtaý basqarmasy basshysynyń orynbasary Lázzat Esenǵalievanyń aitýynsha, oblysta balalar óliminiń kórsetkishi alańdatyp otyr.
«Alǵashqy jartyjyldyq qorytyndysyna sáikes, bul kórsetkish 9.0 quraidy. 2018 jylmen salystyrǵanda tómendeý bar. Alaida, bul deńgei respýblikalyq kórsetkishten de joǵary bolyp otyr. Negizgi sebep - jatyrdaǵy kezeńnen týabitti damý kemistigine deiingi ólim-jitim bolyp otyr. Bizde memlekettik-jekeshe áriptestik jobasy ázirlenip jatyr. Onyń aiasynda 16 ÝDZ apparaty satyp alynady. Qazir qol qoiý jumystary júrýde. Ana ólimi boiynsha da (10,2) ótken jylǵy kórsetkishten tómendep keledi. Qaýip-qater de bar. Onkopatologiia máselesi sheshilip jatyr», - dedi L. Esenǵalieva.
