Densaýlyq saqtaý ministri Eljan Birtanov koronavirýs juqtyrǵan óziniń burynǵy orynbasary Kamaljan Nadyrovpen jaqyn bailanysta bolǵan joq. Bul týraly Qazaqstannyń bas memlekettik sanitar dárigeri Aijan Esmaǵambetova málim etti, dep habarlaidy "Ult aqparat".
«Densaýlyq saqtaý ministrliginiń basshylyǵy jáne jalpy ministrliktegi qyzmetkerlerdiń 90 paiyzy tótenshe jaǵdai jariialanǵaly beri qashyqtan atqarylatyn jumys tártibine kóshken. Kamaljan Nadyrovpen bailanysta bolǵan qyzmetkerlerdiń sany az. Ministr Eljan Birtanov Kamaljan Nadyrovpen jaqyn bailanysta bolǵan joq. Áitse de, ministr de búgin test tapsyrdy. Nátijesin onyń ózi jariialaidy degen oidamyn», - dedi Aijan Esmaǵambetova OKQ-da onlain rejimde ótken baspasóz máslihatynda.
Qazaqstannyń bas memlekettik sanitar dárigeri TJ talaptaryna sáikes, Densaýlyq saqtaý ministrliginiń shtattyq rejimde jumys istep jatqanyn habarlady.
«Densaýlyq saqtaý ministrliginiń ǵimaratyndaǵy qyzmetkerler koronavirýs infektsiiasy boiynsha qaita-qaita testiden ótip júr. Testileý 2 aptada bir ret júrgiziledi. Alaida eshbirinen koronavirýs tabylǵan joq», - dedi ol.
Aita ketsek buǵan deiin Aijan Esmaǵambetova osy ýaqytqa deiin Qazaqstanda koronavirýs juqtyrǵandarmen bailanysta bolǵan 40 myńǵa jýyq azamattyń anyqtalǵanyn málim etken edi. Onyń aitýynsha mamyrdyń sońyna deiin elimizde koronavirýs juqtyrǵandar sany 4 myńǵa jetýi múmkin.
