Aqparat jáne qoǵamdyq damý ministri Dáýren Abaev densaýlyq saqtaý ministri Eljan Birtanovty otstavkaǵa jiberý týraly taraǵan videoúndeýge qatysty pikir bildirdi, dep habarlaidy QazAqparat.
«Densaýlyq saqtaý salasyna qatysty sońǵy qaiǵyly jaǵdai – ártúrli, bir-birimen bailanysy joq oqiǵalar (Atyraýdaǵy sábi ólimi, Almatydaǵy dárigerlerdiń tutqyndalýy men jas dárigerlerdiń videoúndeýi). Ár jaǵdai boiynsha jeke jumys júrgizý kerek. Meniń oiymsha, osy rette meniń áriptesim Eljan Birtanov qastyq oilaǵandar úshin qolaily nysanaǵa ainalǵan sekildi. Eshteńe bitirmegen adamdy ǵana eshkim synamaidy. Al Densaýlyq saqtaý ministrligi sońǵy jyldary qyrýar jumys júrgizdi. Salada júieli ózgerister bolyp jatyr. Mundai jaǵdaida ashyqtyq pen sapany baqylaý isine paida tappaityn kóńili tolmaityndar qashan da tabylady», - dedi Dáýren Abaev «Ashyq dialog» baǵdarlamasynda.
Ministr atalmysh videony kórgenin aitty.
«Ministrliktiń málimdemesine alyp-qosarym joq. Ereje men zań bar. Oǵan baǵyný kerek. Memleket bolashaq dárigerler úshin qarajat bóldi. Al olar oqý bitkennen keiin birden jibergen jumysta isteýge mindetteldi. Olardyń bári de tiisti qujatqa qol qoiǵan. Bul mamandardyń bárin kadrlar defitsiti anyq seziletin aýyldar, aýdan ortalyqtary, aýrýhanalar kútip tur. Ainalyp kelgende bul - aýqymdy tájiribe. Eshqandai rezidentýra atalǵan mindettemelerden bas tartý jolyna ainala almaidy. Bul - kelisimniń buzylýy», - dedi ol.
Dáýren Abaev bul jerde másele ministrde emes ekenin atap ótti.
«Bul jerde másele ministrde emes. Olar kimdi bolsyn ornynan ketirýdi talap ete alady. Alaida kelisimge qol qoidyń ba, mindettemege sai jumys isteýge týra keledi. Jalpy, bul máselege qatysty Densaýlyq saqtaý ministri eshkimnen jasyrynyp júrgen joq. Synaǵandardyń bárimen kezdesip júr. Dialogqa daiyn ekenin árdaiym málimdeidi», - dedi Dáýren Abaev.
