Nur-Sultan qalasynyń turmysy tómen otbasylaryna kómir satyp alýǵa 20 200 teńge beriledi. Bul týraly elordanyń otyn-energetikalyq kesheni jáne kommýnaldyq sharýashylyq basqarmasynyń basshysy Erbol Tóleýov málimdedi, dep habarlaidy Sputnik Qazaqstan.
Jylý berý maýsymy kezeńinde áleýmettik kómek peshpen jylytylatyn jer úilerde turatyn múgedekterge, múgedek balalarǵa, zeinetkerlerge, jan basyna shaqqandaǵy tabysy tórt eń tómengi kúnkóris deńgeiinen aspaityn (133 432 teńge) kópbalaly otbasylarǵa kórsetiledi.
"Ótemaqy somasy 20200 teńgeni, iaǵni 8 ailyq eseptik kórsetkishti quraidy", - dedi Tóleýov jylý berý maýsymyna daiyndyq týraly brifingte.
Aitýynsha, ótemaqy tek bir ret tólenedi. Áleýmettik kómekti alý úshin muqtaj jandar ákimdikke ótinish jazyp, tiisti qujattardy usynýy kerek.
Basqarma basshysynyń málimetine súiensek, elordada jylý berý maýsymy kezeńinde bir otbasy shamamen 7-10 tonna kómir jumsaidy eken.
Sondai-aq, Tóleýov elordada kómir satatyn jeti iri kompaniia bar ekenin atap ótti. Olardyń barlyǵymen kómir baǵasyn kótermeý týraly memorandým bekitilgen.
"Búgingi kúni kómir baǵasy 12 myńnan 14 myń teńgege deiingi aralyqta belgilendi", - dedi basqarma basshysy.
Tamyzdaǵy jaǵdai boiynsha kómirdiń jalpy qory 19 myń tonnadan asady.
