Nur-Sultandaǵy meditsinalyq uiymdar koronavirýs pen pnevmoniiany emdeýge qajet qosymsha jabdyqtarmen qamtamasyz etildi, dep habarlaidy "Ult aqparat" elorda ákimdiginiń baspasóz qyzmetine silteme jasap.
Baspasóz málimetterine qaraǵanda, búgin qala ákiminiń orynbasary Baqtiiar Máken birqatar uiymdarda bolyp, kúzgi maýsymdyq aýrýlar – JRVI men tumaýdyń kóbeiýin eskere otyryp, mekemelerdiń COVID-19 indetine daiyndyǵyn tekserdi.
Osylaisha, 50-den astam jasandy tynys alý apparaty, 2 kompiýterlik tomograf, ókpeniń zaqymdaný paiyzyn kórýge múmkindik beretin 7 sandyq rentgen júiesi, 3 ottegi rezervýary qosymsha satyp alyndy. Sonymen qatar qalanyń emdeý mekemelerine 500-den astam ottegi kontsentratory, 250-ge jýyq jasandy jeldetý tynys alý apparaty, 300-ge jýyq floýmetr, 500 kópfýnktsionaldy arnaiy kereýet jetkizildi. Sondai-aq 1600-ge jýyq ottegi núktesi bar.
«Demalys kúnderi karantin sharalaryn engizýdiń arqasynda qalada COVID-19-ǵa qatysty ahýal turaqtaldy. Meditsina mekemeleri men qyzmetkerlerge aýyrtpalyq túspeý úshin, qatań sanitariialyq normalardy saqtaýdy jalǵastyrý qajet. Koronavirýspen kúreske daiyndyq toqtaǵan emes. 110 tonnadan astam dári-dármek satyp alynyp, mekemeler meditsinalyq jabdyqtarmen qamtamasyz etilýde. Kúzde órshitin JRVI indetimen birge koronavirýsqa qatysty ahýal da kúrdelenýi múmkin. Sondyqtan bizdiń barlyq meditsina uiymdary daiyn.
Jaqynda meditsinalyq jabdyqtardan basqa jyljymaly fliýorografiialyq keshender, sandyq rentgen júieleri jáne joǵary dáldiktegi jeldetkishter de keledi. Mysaly, búginde statsionarlardy ókpeni jasandy jeldetý apparatymen qamtamasyz etý shamamen 94%-dy quraidy», – dedi qala ákiminiń orynbasary Baqtiiar Máken.
Baqtiiar Máken ákimdik jeke jáne respýblikalyq klinikalarmen olardyń kompiýterlik tomografiia apparattaryn qala emhanalary men statsionarlaryna bekitý týraly kelisimge qol qoiǵanyn atap ótti. Kompiýterlik tomograftardyń jalpy sany – 19. Qajet bolsa, qalanyń barlyq 17 statsionary qaita ashylyp, infektsiiamen kúreske jumyldyrylatyn bolady.
