Nur-Sultan qalasy ákiminiń orynbasary Altynbek Qaisaǵaliev astananyń ekologiiasyna áser etetin negizgi faktorlardy atady, dep habarlaidy QazAqparat.
«Atmosferanyń lastaný indeksin qadaǵalap otyramyz. 2018 jyldyń qorytyndysyna sáikes elordada ol indeks 4,95 birlik bolsa, 2019 jyly 4,98 birlikti kórsetti. Jalpy ekologiialyq ahýal qalamyzda turaqty. 2020 jyldyń birinshi toqsanynda osy kórsetkish saqtalady. Degenmen Ekologiia departamentiniń boljamyna sáikes ol kórsetkish kúrt tómendeýi múmkin. Óitkeni tótenshe jaǵdai men karantinge bailanysty avtokólikter qozǵalysy kúrt azaiǵanyn bilesizder. Sondyqtan atmosferaǵa shyǵatyn lastanýshy zattardyń bári de tómendedi. Ekinshi toqsanda da taǵy tómendeitini kútilip otyr», - dedi «ASTANA TV» telearnasynda Elorda live-ta bergen suhbatynda.
Onyń aitýynsha Nur-Sultannyń ekologiiasyna áser etetin negizgi úsh faktor bar.
«Birinshisi – avtokólikterdiń sanynyń ósýi. Qalada 350 myńnan astam kólik tirkelgen. Kúnnen kúnge bul san artyp ta keledi. Ekinshisi – JEO-1 jáne JEO-2 bar. Qalamyz jyldan jylǵa ósip kele jatyr. Salynyp jatqan úiler kóp. Olardyń bárin de jylýmen, elektr qýatymen qamtý kerek. Sondyqtan osy ortalyqtardyń otyn jaǵý qýatynyń artýyna bailanysty atmosferaǵa shyǵaryndylary da kóp bolady. Úshinshi másele – qalada 380-nen astam statsionarlyq qazandyq ornatylǵan. Olardyń sany da artyp keledi. Eger osy úsh faktordyń máselesin shesher bolsaq qalamyzdaǵy ekologiialyq jaǵdaidy edáýir jaqsartýǵa bolady», - dedi ol.
