Foto: Tengrinews.kz
Elordany qar basyp qaldy, - dep habarlaidy Tengrinews.kz agenttigi.
4 qazan kúni keshke bastalǵan qar túnimen jaýyp, tańerteń Nur-Sultandaǵy kólikter men joldardy, aýlalardy basyp qaldy.
Qysqy dóńgelekterin aýystyryp úlgermegen kólik júrgizýshilerge kóktaiǵaqtyń kedergisi az bolmady.
Nur-Sultan qalasynyń politsiia departamenti avtokólik ielerine jazǵy dóńgelekti qysqy dóńgelekke tez aýystyrýdy, belgilengen jyldamdyq rejimin asyrmaýdy, kúrt tejeýge júginbeýdi, qashyqtyqty saqtaýdy suraidy. Sondai-aq jaiaý júrginshilerge joldan óterde abai bolýdy eske saldy.
Elordada bir táýlik ishinde 96 jol-kólik oqiǵasy tirkeldi.
Júrgizýshilerge ǵana emes, jaiaý júrginshilerge de erekshe saq bolýǵa keńes berildi.
"Óz qaýipsizdigimizdiń múddesi úshin qulaqqaptardy alyp tastaýǵa jáne joldy kesip ótken kezde telefonmen sóilesýdi toqtatýǵa keńes beremiz. Ózińizdi jáne jaqyndaryńyzdy qorǵańyz!"- delingen politsiianyń úndeýinde.
Aldaǵy úsh kúndegi aýa raiy boljamyna keletin bolsaq, sinoptikterdiń boljamynsha, Qazaqstan aýmaǵynyń basym bóligi soltústik-batys antitsiklonnyń yqpalynda bolady. Jaýyn-shashyn men tuman, kóktaiǵaq kútiledi.
