Astana halqyn tabiǵi gazben qamtý jumysy byltyr bastaldy. Degenmen búgin Nur-Sultan qalalyq máslihaty qoǵamdyq keńesiniń otyrysynda belgili bolǵandai, gazdandyrý jumysy baiaýlaǵan jáne turǵyndar tarapynan shaǵym az emes, dep habarlaidy QazAqparat.
Nur-Sultan qalalyq máslihatynyń qoǵamdyq keńes múshesi Baýyrjan Smailov elordany gazdandyrý jumysynyń barysyn synǵa aldy.
«Gazdandyrý jumysyna qatysty halyq tarapynan shaǵym kóp. Ásirese kún sýi bastaǵan mezgilde. Gaz tartýǵa jaýapty «QazTransGaz Aimaq» kompaniiasy úlgermei jatyr. Búginde qala boiynsha servistik qyzmetti bir ǵana brigada atqaryp jatyr. Búkil halyq úshin bir ǵana servistik qyzmet, onyń sanyn nege kóbeitpeidi? Basqarma qaida qarap otyr?», - dedi jiynda B. Smailov.
Atalǵan máselege qatysty qalalyq otyn-energetika kesheni jáne kommýnaldyq sharýashylyq basqarma basshysynyń orynbasary Rústem Zakarin pikir bildirdi.
«Sońǵy 3-4 ai ishinde 1 myńnan astam úige gaz tartyldy. Gaz tartý boiynsha kelip túsip jatqan ótinishtiń sany kún sanap artyp jatyr. Jáne elordany gazdandyrýmen «QazTransGaz Aimaq» kompaniiasy emes, «Intergaz Orta Aziia» degen kompaniia ainalysady. Gazdy úige deiin jetkizý - solardyń mindeti. Siz aitqan másele boiynsha biz búginde atalǵan kompaniianyń basshylyǵyna mamandar sanyn arttyrý týraly arnaiy hat joldadyq. Iaǵni, jumys ónimdi bolýy úshin. Siz aitqan «QazTransGaz Aimaq» - jeke kompaniia, ákimdikke baǵynbaidy. Servistik qyzmetti de kóbine jeke uiymdar júrgizedi. Memleket, ákimdik jeke kompaniialardyń ishki jumysyna aralasa almaidy. Degenmen biz aýdandyq ákimdiktermen birlesip, bul máseleni sheshý jaǵyn qarastyryp jatyrmyz. Óz jumysyn josparǵa sai atqaryp jatqan kompaniialar bar, kerisinshe jumysy aqsap jatqan mekemeler de bar», - deidi R. Zakarin.
