Elordada «Jas Otan» jastar qanatynyń bastamasymen dárigerlerdi qoldaýǵa arnalǵan «Alǵys paketi» atty aktsiia ótip jatyr, dep habarlaidy "Ult aqparat".
«15 shildeden bastap dárigerlerdi qoldaý úshin «Alǵys paketi» dep atalatyn aktsiiany bastadyq. Qazirgi ýaqytta aýrýhanalarǵa baryp, dárigerlerge azyq-túlik, iaǵni quramynda búgingi kúni asa qajetti dárýmender bar jemis-jidek, túrli pecheneler, shokolad salynǵan paketter taratamyz. Bul qala jastary men volonterleriniń atynan beriledi. Koronavirýspen kúrestiń aldyńǵy shebinde kúni-túni jumys istep jatqan dárigerlerge qoldaý kórsetkimiz keledi. Keshe úsh aýrýhanaǵa, búgin de úsh aýrýhanaǵa bardyq. Kún saiyn úsh aýrýhanaǵa baryp, aktsiiany birneshe kún jalǵastyrýdy josparlap otyrmyz», - dedi «Jas Otan» jastar qanaty elordalyq filialynyń tóraǵasy Baǵdáýlet Jandildaev.
Sonymen qatar ol aktsiianyń qandai qarajatqa júzege asyrylatyndyǵyn aitty.
«Aktsiia volonterlerdiń jarnalary jáne demeýshilik qarajaty esebinen júzege asyrylady», - dedi ol.
