Álemdegi eń úzdik joǵary oqý ornyna ainalǵan Kembridj ýniversitetinde elordalyq 5 mekteptiń muǵalimderi men qalalyq Bilim berýdi jańǵyrtý ortalyǵynyń ádiskerleri biliktiligin arttyrdy, dep habarlaidy "Ult aqparat" qala ákimdiginiń saityna silteme jasap.
«Share» halyqaralyq jobasyn júzege asyrý aiasynda 1-7 jeltoqsan aralyǵynda Kembridj qalasynda Bottisham Village College, Sawston Village College jáne Kembridj ýniversitetiniń bilim berý fakýltetinde refleksirleýshi praktik muǵalimderdiń qatysýymen birneshe paidaly workshop ótti.
Halyqaralyq jobaǵa elordalyq № 37, 58, 59, 67, 76 mektepteriniń muǵalimderi men Bilim berýdi jańǵyrtý ortalyǵynyń ádiskerleri qatysty. Shara barysynda mektep ómiri, mádenieti, qundylyqtary, kózqarasy, missiiasy jáne zertteý qyzmeti, mektep pedagogtaryn oqytý jáne oqytý tájiribesin jetildirý týraly dárister oqytyldy. Sondai-aq, ustazdar refleksivti zertteý qaýymdastyǵyn qurý, ózgeristerdi basqarý, ózgeristerdi zertteýdiń jáne is — árekettegi tájiribeni zertteýdiń negizgi protsesteri (Action research) sekildi máselerdi talqylady.
Odan bólek, muǵalimder psiholog-zertteýshi Kollin Maklaflin men Keit Evanspen kezdesip, suraqtaryna mazmundy jaýaptardy aldy. Is-shara barysynda 2020 jyldyń 20-21 qańtarynda Nur-Sultan qalasynda ótetin aldaǵy workshop baǵdarlamasy talqyǵa salyndy.
