Nur-Sultan qalalyq politsiia departamentiniń qyzmetkerleri Sankt-Peterbordaǵy áriptesterimen birlesip, halyqaralyq izdeýde júrgen 39 jastaǵy áiel adamdy ustady, dep habarlaidy "Ult aqparat".
Elordalyq politsiia departamentiniń málimetinshe, kúdiktige 2019 jyldyń qazanynda senip tapsyrylǵan múlikti iemdený jáne talan-tarajǵa salý aiyby taǵylǵan. Qazirgi kezde ol Reseidiń Sankt-Peterbor qalasyndaǵy ýaqytsha oshaýlaǵyshqa qamaldy.
«Kúdiktini Qazaqstan Respýblikasyna ekstraditsiialaý máselesi sheshilýde. Ol politsiiadan jasyryný úshin Reseidiń ártúrli aimaǵynda turǵylyqty jerin únemi aýystyryp otyrǵan. Bet-álpetin ózgertip, jaldamaly páterlerde turǵan. Óziniń týystarymen senimdi adamdar arqyly bailanysqan», - dedi vedomstvodan.
Politsiia aqparatyna sáikes, kúdikti Nur-Sultan qalasynda «Talisman» kóppáterli úidiń qurylysy úshin «Jeńis Astana Premiým» turǵyn úi qurylys kooperativin tirkegen. Osy maqsatta ol investorlardy tarta bastaǵan. Turǵyn úi kooperativi quramyna jańa múshelerdi tartý jáne jarnalardy alý arqyly adamdardan qomaqty somany jinap alyp, ózi iemdengen. Úleskerlerden jinalǵan aqshanyń ortasha somasy 2 milliard teńgeni quraidy.
