Elordada ótken jyly dúnie esigin ashqan sábilerge Álihan men Aizere atty esimder jii qoiylǵan, dep habarlaidy "Ult aqparat" qala ákimdiginiń saityna silteme jasap.
2017 jyly elordada dúniege kelgen 405 sábige Aizere esimi berilipti. 354 ret qoiylǵan Ailin degen esimi ekinshi orynda. Úzdik úshtikte Ámina esimi tur, 353 ata-ana óz balasyna osy esimdi tańdaǵan.
Aiarý, Aisha, Raiana, Aiala, Káýsar, Dariia, Ádiia, Injý, Aiym jáne Tomiris esimderi de ótken jyly qyz balalarǵa qoiylǵan esimderdiń arasynda aldyńǵy qatarda tur.
Al uldar arasynda jii qoiylǵan esimderdiń úshtigine Álihan, Ámir jáne Áli esimderi kiredi. Elordada 12 ai ishinde bul esimder 328, 255 jáne 222 balaǵa berildi. Sondai-aq, astanalyq ata-analar ózderiniń ul balalary úshin jii tańdaǵan esimderdiń arasynda Aisultan, Sanjar, Erasyl, Arlan, Arsen, Nurislam, Alan, Mansur, Ramazan, Miras jáne Álinur esimderi de kezdesedi.
Balalarǵa elde bolyp jatqan oqiǵalarǵa bailanysty esim qoiý dástúri de ózgergen joq. Halyqaralyq EKSPO kórmesin ótkizý kezinde «Esil» aýdanynyń AHAT bólimshesinde ul balaǵa qoiylǵan Bádibekspo esimi tirkeldi.
«Esil», «Saryarqa» jáne «Almaty» aýdandarynyń AHAT bólimsheleri bergen málimetterge sáikes, elordada 2017 jyly Astanada dúniege 34 087 sábi kelgen. 2016 jyly bul kórsetkish 32 056 balany qurady.
