Elordadaǵy «Zerde» mektebiniń oqýshysy Arýjan Maqsutovanyń volonterlikti janyna serik etkenine eki jyl bolypty. Ol kóńilinen shyqqan volonterlik qyzmetti aldaǵy ýaqytta da atqara bermek, dep habarlaidy QazAqparat.
«2018 jyldan beri volontermin. Volonterlik qyzmet barlyq ýaqytta da unaityn. Ol seniń ekinshi otbasyń siiaqty. Múmkin bolashaqta da ómirimdi osy iske arnaityn shyǵarmyn. Óitkeni ózime qatty unaidy. Sondyqtan jańa sharalarǵa baryp, adamdardy bile túsýge, otbasyma kóp adamdy tarta túsýge tyryspaqpyn. Volonterlik qyzmettiń arqasynda kóptegen jańa adamdarmen tanystym. Volonterlerdiń arqasynda fotografiiany jaqsy kóretindigimdi bilip, ózim de fotografqa ainaldym. Buǵan qosa, ýaqytymdy paidaly iske arnap, adamdarǵa kómek qolyn sozatyndyǵymdy túsinemin», - dedi ol volonterlerdiń «Birgemiz» respýblikalyq front-keńsesiniń resmi ashylýyna arnalǵan sharada.
Arýjan Maqsutova elordada ótken Dimash Qudaibergenniń kontsertin, IronMan jarysyn, kóptegen kontsert pen kórmeni uiymdastyrýǵa qatysyp, ysylǵan. Volonterlermen aqsha jinap, balalar úilerine tamaq pen oiynshyqtar jiberýge atsalysqan.
«Sábilerdiń júzindegi shynaiy qýanysh bizdi shabyttandyrady. Árine, bul sharalardyń bárinen buryn meni Dimashtyń kontserti tań qaldyrdy. Súiip tyńdaityn, teledidardan san márte tamashalaǵan ánshińniń jandy beinesin jaqynnan kórgen sáttegi sezimdi sózben aityp jetkizý qiyn. Al sol baqytty sát volonterliktiń arqasynda buiyrdy», - dedi jas volonter.
Volonterlikke qurbysynyń úgitteýimen kelgen Arýjan bul isine esh ókinbeitindigin aitady.
«Volenterlikke tosynnan keldim, bul qozǵalysqa qurbym shaqyrǵan edi. Kelisimimdi bergen sátten beri áli bir ret te ókingen emespin», - dedi ol.
.jpeg)