Arystaǵy jarylystan zardap shekken eki bala elordaǵa em alýǵa jetkizilgen bolatyn. Astanalyq dárigerler balalardyń búgingi jaǵdaiy týraly aityp berdi, dep habarlaidy QazAqparat.
«28 maýsym kúni keshke qarai Shymkentten 2005 jáne 2011 jyly týǵan eki kishkentai naýqas bizdiń balalar aýrýhanasynyń jansaqtaý bólimine jetkizildi. Dárigerler eki naýqastyń da bas miy men kókiregin KT ótkizip, bireýine operatsiia jasady. Qazirgi ýaqytta ekeýi de neirohirýrgiia bólimine aýystyrylyp, em alyp jatyr. Onyń bireýi, iaǵni 2011 jyly dúniege kelgen balanyń jaǵdaiy aýyr. Eki balaǵa da diagnostika jasalyp, em alý tolyq kólemde júrgizilýde. Zardap shekken balalardyń densaýlyǵyn jaqsartý jolynda ózimizdiń, sonymen qatar, respýblikalyq neirohýrirgiia ortalyǵynyń mamandary kúresip jatyr», - dedi qalalyq №2 balalar aýrýhanasynyń bas dárigeri Birjan Dosmaiylov.
Onyń aitýynsha, ekeýi de ashyq bas jaraqatyn alǵan jáne tolyq jazylǵansha aýrýhanada jatady.
«Balalardy elordaǵa alyp kelerde ata-analasynan ruqsat alyndy jáne olar qazir balalarymen birge», - dedi ol.
Eske sala ketsek, buǵan deiin QR Densaýlyq saqtaý ministri Eljan Birtanov eki balanyń em alý úshin elordaǵa jetkizilgenin aitqan bolatyn.
«№2 qalalyq balalar aýrýhanasynda balalardyń emine qajetti barlyq jaǵdai jasalǵan. Bilikti mamandardy shaqyrdyq, munda meditsinalyq apparattar men dári-dármek te jetkilikti. Balalardyń jaǵdaiy meniń jeke baqylaýymda bolady», - dedi ministr.
