20 sáýirden bastap Nur-Sultan jáne Almaty qalalarynda karantin jeńildep, birqatar kásipkerlik sýbektileriniń jumysy jandanǵan edi. Qoǵamdyq tamaqtaný nysandarynyń da jetkizý qyzmeti saǵat 22:00-ge deiin uzartyldy.
Osy oraida elordalyq «Buter Bro» JShS direktory Murat Sapabekov QazAqparat tilshisine karantinniń bizneske qalai yqpal etkenin aityp berdi.
«Bizdiń kompaniia 2015 jyly qalanyń oń jaǵalaýynda ashylǵan edi. Strit-fýd baǵytynda aitarlyqtai tanymal orynǵa ainaldyq dep aita alamyn. Biyl elordanyń sol jaǵalaýynan taǵy bir filialymyz ashyldy. Ashylǵany sol-aq edi, pandemiia bastalyp, elimizde tótenshe jaǵdai rejimi engizildi. Bul rejim biz sekildi talai shaǵyn jáne orta bizneske áserin tigizdi», - deidi M. Sapabekov.
Onyń aitýynsha, kompaniia taǵamdary jetkizý qyzmeti arqyly ǵana qoljetimdi. Turǵyndardyń ózi kelip, alyp ketýine tyiym salynǵan.
«Osyǵan bailanysty, qosymsha kýrerler jaldap, Wolt qosymshasymen jumys istei bastadyq. Jetkizýde barlyq sanitarlyq normalar saqtalady. Iaǵni, kýrerlerimiz qorǵanys quralymen, meditsinalyq maska, qolǵappen qamtamasyz etilgen. Bir tapsyrysty jetkizgen soń, mindetti túrde qolyn sanitaizermen óńdep, qolǵaby men maskasyn, bir rettik qorǵanys kiimin aýystyrady jáne kelesi tapsyrysty jetkizge attanady», - dep túsindirdi kompaniia ókili.
Tapsyrysy jetkizýde de klienttermen 2-3 metr ara qashyqtyq saqtalady.
«Karantinniń bizge paidaly tustary da boldy. Máselen, eki jyl boiy keiinge qaldyryp kelgen internet-saitymyzdy bir túnde jasap shyǵardyq. Qazir osy sait pen mobildi qosymsha, áleýmettik jelidegi resmi paraqshalarymyz arqyly tapsyrys qabyldaimyz. Munda klient kýrerdiń ózine jaqyndamaýyn, tapsyrysty qaldyryp, 2-3 metrge alshaqtaýyn talap ete alady. Munyń bári - qaýipsizdik maqsatynda qolǵa alynǵan sharalar. Tapsyrys aqysyn da klient onlain karta arqyly qashyqtan jiberedi», - deidi M. Sapabekov.
Dámhana qyzmetkerleri de jumys ornynda barlyq gigienalyq talapty ustanady.
«Kúndelikti saǵat 11:00-de jumysqa kelip, sanitaizermen qolymyzdy, ústelderdi súrtip shyǵamyz. Ár eki saǵat saiyn kvarts lampasyn 20 minýtqa qosyp qaldyramyz. Edendi de ylǵal shúberekpen birneshe ret súrtý zańdylyqqa ainaldy. Árine, TJ saldarynan burynǵydai tutynýshylar legi baiqalmaidy. Degenmen, bir orynda toqtap qalmai, tapsyrystar arqyly jumys istep jatyrmyz. Karatinnen erterek shyǵyp, súiikti kelýshilerimizben tezirek qaýyshqymyz keledi», - dedi M. Sapabekov.
Eske sala keteiik, QR Prezidenti janyndaǵy Tótenshe jaǵdai rejimin qamtamasyz etý memlekettik komissiiasy búginnen bastap Nur-Sultan jáne Almaty qalalarynda jumysyn bastaityn kásipkerlik sýbektilerdiń tizimin bekitti.
Tizimde ónerkásiptik kásiporyndar, qurylys jáne jol-qurylys salalarynyń kompaniialary, iri qurylys dúkenderi, kólik, qoima kompaniialary, aýyl sharýashylyǵy maqsatyndaǵy servistik kompaniialar, avtosalondar, TQS, avto jýý, dóńgelek aýystyrý servisi, avtobólshekter dúkenderi, himiialyq tazalaý, keńse tehnikasyn jóndeý jáne ekinshi deńgeili bankter bar.
