Astanada 100-ge jýyq biýdjet qyzmetkeri turǵyn úi sertifikaty boiynsha alǵashqy zaemdarǵa ie boldy.
Ótken jyly qolǵa alynǵan biýdjet qyzmetkerlerine arnalǵan jobaǵa sáikes qalalyq ákimdik úsh sala boiynsha (ustazdar, dárigerler jáne politsiia mamandary) qyzmetkerler tizimin Turǵyn úi qurylysy jinaq bankine joldaidy. Odan ári, bank biýdjet qyzmetkerleriniń tabysy men tólem qabiletin qarastyrady. Sonyń negizinde alǵashqy zaem tabys etiledi, dep habarlady Elorda Info.
"Ózderińiz biletindei, 2018 jyldyń jeltoqsanynda qalalyq ákimdikpen biýdjet salasy qyzmetkerlerine arnalǵan birlesken jobany qolǵa aldyq. Ol maqsatta 100 million teńge bólindi, onyń 90 milliony 90 adamǵa tabys etildi. Búgin sol azamattar sol turǵyn úi sertifikattary boiynsha alǵashqy zaemdaryn alýda. Sol siiaqty biyl atalǵan joba óz jalǵasyn tabady, ol úshin ákimdikten 2 milliard teńge qarajat qarastyrylýda", - dedi Turǵyn úi qurylys jinaq banki ortalyq filialynyń direktory Jansultan Mataev.
Onyń aitýynsha, turǵyn úi sertifikatyn alýshylardyń tizimin qalalyq ákimdik jasaqtap beredi. Tizimdegilerdiń ótinish bergen sátte Astanada jáne onyń mańaiynda baspanasy bolmaýy tiis.
"Sertifikatty alǵan soń baspana qarastyra bastadym. Árine bul jerde tólem qabileti óte mańyzdy, sondyqtan árkim óz shamasyna qaraibaspana izdeidi. Men turǵyn úi qurylys jinaq bankine 2 million teńge jinaqtadym jáne ákimdik tabystaǵan 1 million bar, sol qarajatpen ótip otyrmyn. Iaǵni bank meniń tólem qabiletimdi baǵalai kele, 7% mólsherlemesin 3,8%-ǵa tómendete otyryp 15 jylǵa nesie berdi", - dedi jańa baspanaǵa ie bolǵan qalalyq №13 mekteptiń muǵalimi Laýra Baimyrzaeva.
Eske salsaq, ótken jyldyń jeltoqsan aiynda Astana qalasynyń ákimi Baqyt Sultanov qaladaǵy 100 biýdjet qyzmetkerine baspana sertifikatyn tabys etken bolatyn.
