Elordada aiazdy kúni balaqshadan kishkentai bala juqa kiimmen dalaǵa shyǵyp ketken. Bul jaiynda qala turǵyny Ásem Vahala Feisbýktegi paraqshasynda jazdy, dep habarlaidy QazAqparat tilshisi.
«Búgin Saryarqa 15 pen Saryarqa 17 arasynda aiazda ústinde juqa koftasy, kolgotkasy men báteńkesi bar balanyń jylap turǵanyn kórdim. Juqa kiimmen jalǵyz turǵan balaǵa nazar aýdarmastan qasynan ótip jatqan adamdar jaǵa ustatty», - dep atap ótedi Ásem Vahala.
Onyń jazýynsha, bala «Intellectumbala» balaqshasynyń tárbielenýshisi bolyp shyqqan jáne onyń qyzmetkerleri de balanyń aiazdy kúni qalaǵa qalai shyǵyp ketkenin aita almaǵan.
Bul oqiǵaǵa orai Astana qalalyq bilim basqarmasy da pikir bildirdi.
Vedomstvonyń baspasóz hatshysy Jazira Asanovanyń jazýynsha, atalmysh balabaqsha elordanyń bilim basqarmasynyń tizimine alynbaǵan. Qyzmeti de reglamenttelmegen balabaqsha kottedjde ornalasqan, beinebaqylaý kamerasy men kúzetshisi de joq.
«Shynymen de, bala tárbieshiniń salaqtyǵynan dalaǵa shyǵyp ketken. Ata-analarynan bizge shaǵym áli túsken joq. Degenmen, biz Astana qalalyq bilim salasyn baqylaý departamentine atalǵan mekemeniń bilim salasynda qyzmet júrgizýge ruqsaty bar-joǵyn tekserýdi ótinip, hat joldadyq. Astana qalalyq bilim basqarmasy «kóleńkeli balabaqshalarǵa» balasyn rásimdeý barysynda qaýip-qater bar ekenin eskertedi», - dedi ol.
