Elordadaǵy jaryqsyz qalǵan birqatar ákimshilik ǵimarattar men turǵyn úilerge elektr qýaty berildi, dep habarlaidy "Ult aqparat" qala ákimdiginiń baspasóz qyzmetine silteme jasap.
«Ákimshilik jáne turǵyn ǵimarattarǵa elektr jaryǵy berildi. 9 kóppáterli turǵyn úi kesheni, sondai-aq Aqorda, Parlament Senaty, Májilis, Ministrlikter Úii, Úkimet Úii, Joǵarǵy Sot elektrmen jabdyqtaldy. Sonymen qatar, 9 kóppáterli turǵyn úi jaryqpen qamtyldy, olar - «Ýiýt», «Kraýn Plaza», «Tumar» (2 úi), «Art Haýs», «Viva plaza», «Alataý», «Na vodnom zelenom býlvare». «Báiterek» monýmentin, «Izýmrýdnyi kvartal» biznes ortalyǵyn, «Kerýen», Ulttyq kitaphana men Ulttyq muraǵat ǵimarattaryn jaryqqa qosý boiynsha jumys júrip jatyr» delingen habarlamada.
Kábildik jelilerdi 15 adamnan turatyn brigadas men 6 arnaiy tehnika qalpyna keltirdi. Ǵimarattardy elektrmen jabdyqtaý órt sóndirý brigadalaryna ruqsat berý kezinde elektr toǵymen zaqymdanýdan qaýipsizdik maqsatynda ajyratyldy.
Avariialyq-qalpyna keltirý jumystaryn júrgizý ornyna elorda ákimi Altai Kólginov shyqty. Qala ákimi apat sebebin anyqtaýdy tapsyrdy.
«Elektr jelilerin qalpyna keltirgen AREK qyzmetkerlerine alǵys aitamyn», - dep jazdy shahar basshysy Instagram paraqshasynda.
Eske sala keteiik, keshe elordadaǵy «Levoberejnaia» 110/10 kV shaǵyn stantsiiasynyń 10 kV kabel kanalynda órt shyǵyp, kabel jelisi zaqymdandy. Saldarynan sol jaǵalaýdaǵy keibir turǵyn úiler men ǵimarattar jaryqsyz qalǵan edi.
