Nur-Sultan qalasyndaǵy turǵyn úi nysandary stýdenttik jataqhana bolyp qaita beiindeledi. Bul týraly QazAqparat Bilim jáne ǵylym ministrligine silteme jasap habarlaidy.
QR Bilim jáne ǵylym ministrliginiń ókilderi elordalyq stýdentterdiń turǵyn úige qatysty máselesin sheshý úshin investorlarmen tiisti kelissózder júrgizdi. Búgingi tańda 9 investor ǵimarattardy qaita beiindeýge daiyn ekendikterin málimdedi.
«Biz salynyp jatqan, sondai-aq qoldanysqa berilgen turǵyn úi nysandary men jataqhana retinde paidalanýǵa bolatyn ǵimarattarǵa bardyq. Osy rette turǵyn úilerdiń nysanaly maqsatyn ózgertý múmkindigin egjei-tegjeili qarastyrdyq. Nysandardy osy jyldyń jeltoqsan aiynda tapsyrý josparlanǵan. Biz bul máseleni, sondai-aq stýdentterdi jataqhanamen qamtamasyz etý máselesin keshendi sheshýdi baqylaýda ustaimyz», — dep atap ótti QR BǴM Qarjy ortalyǵynyń ilgeriletý jáne syrtqy kommýnikatsiialar departamentiniń direktory Alpamys Satybaldin.
Sonymen qatar QR BǴM stýdenttik jataqhanalardy qaita qurý qarqynyn jedeldetý úshin jańa jaǵdailar jasaldy. Atap aitqanda, ǵimarattardy jataqhana etip qaita qurý kezinde memlekettik tapsyrys mólsheri eki esege jýyq ulǵaityldy. Iaǵni, stýdent alǵan árbir oryn úshin 47 AEK-ten 92 AEK-ke deiin. Bul norma Nur-Sultan jáne Almaty qalalaryndaǵy obektilerge qatysty qoldanylady. Mundai jańashyldyq stýdenttik jataqhanalar sanyn aitarlyqtai arttyrýǵa jáne bilim alýshylardyń ómir súrý jaǵdailaryn jaqsartýǵa múmkindik beredi. Bul rette atalǵan jataqhanalar óziniń nysanaly maqsaty boiynsha keminde 20 jyl jumys isteýi tiis.
Sońǵy úsh jylda elimizde 90-nan astam stýdenttik jataqhana paidalanýǵa berildi. Osy jyldyń sońyna deiin taǵy 32 nysan qoldanysqa beriledi.
