Qazaqstannyń Tuńǵysh Prezidenti – Elbasy Nursultan Nazarbaev M.V. Lomonosov atyndaǵy Máskeý memlekettik ýniversitetine bardy, dep habarlaidy "Ult aqparat" elbasy.kz saityna silteme jasap.
Nursultan Nazarbaev rektor V.Sadovnichiimen kezdesip, QR Tuńǵysh Prezidenti – Elbasy kitaphanasynyń eýraziialyq integratsiia ideiasyna arnalǵan kórme ekspozitsiiasymen tanysty jáne ýniversitet mýzeiin aralap, Qurmetti qonaqtar kitabyna jazba qaldyrdy.
V.Sadovnichiimen kezdesý barysynda Elbasy M.V. Lomonosov atyndaǵy Máskeý memlekettik ýniversiteti joǵary bedelge ie ekenin jáne halyqaralyq deńgeide moiyndalǵanyn atap ótti.
«Ýniversitet joǵary suranysqa ie mamandyqtar boiynsha kadrlar daiarlaityn Reseidegi eń iri jáne mańyzdy oqý orny», - dedi Nursultan Nazarbaev.
Qazaqstannyń Tuńǵysh Prezidenti postkeńestik keńistiktegi integratsiialyq protsesterdiń damý tarihyna toqtaldy.
– Men 1994 jyly naýryz aiynda Máskeý memlekettik ýniversitetinde Eýraziialyq ekonomikalyq odaq qurý ideiasyn aitqan bolatynmyn. Sol kezde aldaǵy yntymaqtastyq josparynyń tujyrymdamasyn usyndym. Al 2014 jyly biz Eýraziialyq ekonomikalyq odaq qurý týraly shartqa qol qoidyq, - dedi Nursultan Nazarbaev.
Elbasy qiyndyqtarǵa qaramastan Eýraziialyq ekonomikalyq odaqqa qatysýshy elder arasyndaǵy saýda ainalymy ósip kele jatqanyn atap ótti.
– Qyryqtan astam el odaqqa qosylýǵa niet bildirdi. Qazir álemde integratsiiasyz ómir súrý múmkin emes. Integratsiia memlekettiń odan ári damýyna múmkindik beredi. EAEO-nyń keleshegi zor dep sanaimyn. Alda aýqymdy jumys kútip tur, - dedi Qazaqstannyń Tuńǵysh Prezidenti.
Sonymen qatar, Nursultan Nazarbaev Qazaqstannyń astanasynda ornalasqan Máskeý memlekettik ýniversiteti filialynyń damý qarqynyna toqtaldy.
– Resei Prezidentimen jasalǵan kelisimge sáikes elordamyzda Máskeý memlekettik ýniversitetiniń filialyn ashtyq. Qazir filial keńeiip jatyr, oryn jetispeýshiligi baiqalady. Sondyqtan biz jalpy aýdany 20 myń sharshy metr bolatyn oqý korpýsyn Máskeý memlekettik ýniversiteti filialyna bereiin dep jatyrmyz, - dedi Elbasy.
QR Bilim jáne ǵylym ministrliginiń aqparaty boiynsha, oqý ǵimaraty Saryarqa aýdanynda ornalasqan jáne 800 stýdentke arnalǵan. Sonymen qatar, filialdyń jańa ǵimaraty oqý ornynyń ǵylymi áleýetin damytýǵa yqpal etedi.
- Eger biz alǵa jyljyp, ǵylymi-tehnikalyq progresten qalmaiyq desek, bilim salasyn damytýdy qolǵa alǵanymyz jón. Sondyqtan Qazaqstanda «Nazarbaev Ýniversitetin» ashtyq. Sondai-aq, ýniversitet deńgeiine sai keletin talapkerlerdi daiyndaý úshin respýblika boiynsha 22 ziiatkerlik mektep saldyq, - dedi Qazaqstannyń Tuńǵysh Prezidenti.
Óz kezeginde rektor Viktor Sadovnichii Nursultan Nazarbaevqa sapary úshin rizashylyǵyn bildirip, Elbasynyń Eýraziia qurlyǵyndaǵy integratsiialyq úderisterdi nyǵaitýdaǵy erekshe rólin atap ótti.
– Men Sizdiń ýniversitetke degen kóńilińizdi joǵary baǵalaimyn jáne EAEO-ny damytýǵa qosqan úlesińizge tántimin. Siz durys jáne naqty sheshimder qabyldadyńyz. Únemi yntymaqtastyqqa umtyldyńyz, - dedi rektor.
Kezdesý sońynda Máskeý memlekettik ýniversitetiniń qurmetti doktory Nursultan Nazarbaevqa joǵary nagrada – «Máskeý ýniversitetiniń juldyzy» tabystaldy.
