Elordanyń ákimi Altai Kólginov tótenshe jaǵdai kezinde qaladan nege ketip qalǵanyn túsindirdi. Qala basshysy Birikken Arab Ámirlikterine baryp keldi, – dep habarlaidy Sputnik Qazaqstan.
"Qar ketedi, eridi. Al investorlardy kim alyp keledi? Sondyqtan ony júieli túrde oilaý qajet. "Ákim bolsa, jumys bar, ákim joq bolsa, jumys joq" degen durys emes. Júie júrip turýy qajet. Kommýnaldyq mekemeler durys jumys atqardy. Meniń bir kúnge baryp kelgenimen eshteńe bola qoiǵan joq. Sapardan keldik, sóitip, túnde qardy qaitadan baqylaýǵa kirisip kettik", - dedi Kólginov "Habar 24" arnasyna bergen suhbatynda.
Ákimniń aitýynsha, Birikken Arab Ámirlikteriniń bir investory Nur-Sultanda 35 million AQSh dollaryna jeke jobasyn salatyn boldy. Oǵan qosa, isspar kezinde taǵy úsh investitsiialyq joba boiynsha kelissózder júrgizildi.
"Endi, qazir áńgimeniń bári qarǵa bailanysty bolyp jatyr ǵoi. Dúrbeleńge salynbaý qajet. Shamaly sabyr etý kerek. Bul, endi, tabiǵattyń tosyn minezi, tabiǵatqa qarsy keletin eshteńe joq. Biraq biz oǵan qarap otyrmaimyz. Búkil kúshimizdi salyp, qardy kúni-túni shyǵaryp jatyrmyz", - dep atap kórsetti Kólginov.
Aita ketsek, osy aptada memleket basshysy Qasym-Jomart Toqaev Birikken Arab Ámirlikterine resmi saparmen bardy. Ol Abý-Dabidiń taq murageri sheih Muhammed ben Zaid Ál Nahaianmen kelissóz júrgizdi. Buǵan qosa, Qazaqstan prezidenti Birikken Arab Ámirlikteriniń vitse-prezidenti, premer-ministri, Dýbai bileýshisi sheih Muhammed ben Rashid Ál Maktýmmen kezdesti. Odan keiin Toqaev Dýbaidyń halyqaralyq qarjy ortalyǵyna bardy, basqa da birqatar mańyzdy kezdesý ótkizdi.
Sonymen qatar Toqaevqa Dýbaidaǵy EXPO-2020 halyqaralyq kórmesinde salynatyn Qazaqstan pavilony tanystyryldy.
Al úkimettiń keshegi otyrysynan keiin ulttyq ekonomika ministri Rýslan Dálenov prezidenttiń tapsyrmasynan keiin Qazaqstannyń Dýbaidaǵy EKSPO kórmesine jumsaityn qarjysy qaita qaralatynyn málimdedi. Oǵan 9 milliard teńge qarastyrylǵan.
