Nur-Sultan qalalyq bilim basqarmasynyń basshysy Sholpan Qadyrova balabaqshalardyń jumysyn jandandyrýǵa qatysty túsinik berdi, dep habarlaidy QazAqparat.
«Biyl 18 mamyrdan bastap menshik nysanyna qaramastan mektepke deiingi barlyq bilim berý mekemeleri kezekshi top rejiminde jumystaryn bastaýǵa daiyn. Eger epidemiologiialyq jaǵdai turaqty bolsa, bizder balabaqshalardyń esigin ashamyz. Balabaqshalar sanitarlyq-dezinfektsiialyq normalardy qatań saqtai otyryp, balany úide qaldyrýǵa múmkindigi joq jumys isteitin ata-analar úshin, odan keiin ǵana basqa ata-analardyń qalaýy boiynsha balalardy qabyldaidy. Árbir mektepke deiingi uiymdardyń kezekshi toptarynda bala sany 15-ten aspaýy tiis. Eger balabaqshaǵa kelmegen jaǵdaida, balanyń orny saqtalady», - dedi Sh. Qadyrova onlain baspasóz máslihatynda.
Onyń sózine qaraǵanda, bir topta bala sany 15-ten asatyn bolsa, sol balabaqshada taǵy kezekshi toptar ashylady.
«Búginde mektepke deiingi uiymdarǵa qajettilikti anyqtaý úshin ata-analar arasynda monitoring júrgizilip jatyr. Ol úshin ata-analar ózderiniń tárbieshilerine balabaqshaǵa baratyny týraly aqparatty bir kún buryn habarlaýy qajet. Ár balabaqshada kezekshi toptardyń jumys algoritmi ázirlendi. Barlyq nysandar sanitarlyq talaptarǵa sáikes daiyndaldy», - dedi basqarma basshysy.
«Balalardy qabyldaý ýchaskelik pediatrdyń balanyń densaýlyq jaǵdaiy týraly bergen anyqtamasy bolǵan jaǵdaida júzege asyrylady. Balany balabaqshaǵa qabyldaý kezinde tárbieshi meditsinalyq qyzmetkerdiń baqylaýymen mindetti túrde dene qyzýyn ólsheidi. Osyǵan bailanysty ata-analardy tárbieshilerdiń qaýipsiz bolýy úshin jasalyp jatqan sharalaryna túsinistikpen qarap, qoldaý kórsetýlerin suraimyz», - dedi Sholpan Qadyrova.
