Elordada kórnekti memlekettik jáne qoǵam qairatkeri Jumabek Táshenovke eskertkish ornatylady. Bul týraly Parlament Májilisiniń depýtaty Káribai Musyrman málim etti, dep habarlaidy QazAqparat.
Eskertkish Jumabek Táshenov kóshesiniń boiynda ornatylatyny josparlanǵan.
«Bul - Petropavl qalasynda turatyn Soltústik Qazaqstan oblysynyń qurmetti azamattary Jaqsylyq Ysqaqov, Bolat Saǵyndyqov, Zeinolla Oljabaev, Tańat Súgirbaev, Amangeldi Kenjeǵozinov, Ahmetjan Qýantaev, Jangeldi Tájin jáne Saǵyndyq Salmurzin syndy belsendi aǵalarymyzdyń bastamasy. Sol kisiler Prezident sailaýy qarsańynda «Nur Otan» partiiasynan usynylǵan kandidat Qasym-Jomart Toqaevtyń oblystyq qoǵamdyq qabyldaý bólmesi arqyly Parlament Májilisiniń depýtaty retinde maǵan hat joldap, astanamyz Nur-Sultan qalasynda kórnekti memleket jáne qoǵam qairatkeri Jumabek Táshenovke eskertkish ornatýǵa kómektesýimdi suraǵan edi», - deidi Káribai Musyrman.
Onyń aitýynsha, osy jóninde Nur-Sultan qalasynyń burynǵy ákimi Baqyt Sultanovqa hat joldanǵan.
«Halqymyz airyqsha ardaq tutatyn tarihi tulǵanyń dúniege kelgenine kelesi jyly 105 jyl tolatynyn eskere otyryp, oǵan astanada laiyqty eskertkish ornatý máselesin qaraýyn ótingen bolatynmyn. Búgin Nur-Sultan ákiminiń orynbasary Erlan Kanalimov qol qoiǵan resmi jaýapty alyp, qýanyp otyrmyn. Qala ákimdigi Jumabek Táshenovke eskertkish ornatý úshin jer telimi jáne qarjy kózi qarastyrylyp jatqandyǵyn habarlady. Eskertkish elordadaǵy Jumabek Táshenov kóshesiniń boiynda ornatylmaq. Al Petropavl qalasynda qazaq jeriniń tutastyǵyn saqtap qalý úshin basyn báigege tikken qaharman erge eskertkish osydan birneshe jyl buryn ornatylǵan bolatyn», - dedi májilismen.
Káribai Musyrmannyń aitýyna qaraǵanda, eskertkish ornatý máselesi qala deńgeiinde sheshilip tur.
«Bul sharýanyń saiasi mańyzy joǵary. Elordada Jumabek Táshenovke laiyqty eskertkish ornatý kerek. Ol - Baýyrjan Momyshuly siiaqty jastarǵa rýh beretin úlken tulǵalardyń biri», - deidi Káribai Musyrman.
