Elordada bes qabatty jataqhana órtendi, dep habarlaidy tótenshe jaǵdailar komitetiniń baspasóz qyzmeti.
2 mamyr kúni saǵat 10:39-de tótenshe jaǵdailar departamentiniń "101" pýltine Baiqońyr aýdany Halel Dosmuhameduly kóshesindegi bes qabatty jataqhanadan órt shyqqany týraly habar túsken.
"Órt ǵimarattyń ekinshi qabatyndaǵy bólmeden shyqty. Jalyn 20 sharshy metrdi sharpydy. Oqiǵa ornyna shuǵyl jetken mamandar tilsiz jaýdy 11:15-te aýyzdyqtady", - delingen habarlamada.
Sonymen qatar órt sóndirýshiler avtosatynyń kómegimen 32 adamdy qaýipsiz jergen kóshirdi. Onyń 28-i bala eken.
"Jataqhanadaǵy 350 adam óz kúshimen syrtqa shyqty. 20 turǵyn dárigerlerden kómek surady. Olardyń ishinde 14 bala bar. Mamandar órttiń shyǵý sebebin anyqtap jatyr. Órtti aýyzdyqtaýǵa qalalyq tótenshe jaǵdailar departamentiniń 66 qyzmetkeri men 18 órt sóndirý kóligi jumyldyryldy", - dep málimet berdi tótenshe jaǵdailar komiteti.
Sondai-aq, órtten zardap shekkenderge QR IIM TJK apattar meditsinasy ortalyǵynyń 6 dárigeri kómek kórsetken.
Oqiǵa ornyna qala basshysy da jetti. Óz kezeginde Baqyt Sultanov Baiqońyr aýdandyq ákimdigi basshylaryna órtten zardap shekken jandarǵa jan-jaqty kómek kórsetýdi tapsyrdy.
Sonymen qatar, turǵyndar elorda ákimine jataqhanany apat jaǵdaiyndaǵy súriletin turǵyn úi qataryna qosýdy surady. Ótinish boiynsha ákim arnaiy áleýmettik komissiia jiberip, ǵimaratty tekserýdi tapsyrdy.
