Q.Qýanyshbaev atyndaǵy Memlekettik akademiialyq qazaq mýzykalyq drama teatrynda Jambyl Jabaevtyń 175 jyldyq mereitoiy bastaldy, dep habarlaidy "Ult aqparat".
Saltanatty ashylýǵa mádeniet jáne ǵylym qairatkerleri, Almaty jáne Jambyl oblystarynyń delegatsiialary keldi. Kelýshiler jańa teatr foiesinde uiymdastyrylǵan Jambyl Jabaev mýzeiinen jetkizilgen ekspozitsiiamen tanysty.
«Q.Qýanyshbaev atyndaǵy Memlekettik akademiialyq qazaq mýzykalyq drama teatry men «Astana Opera» memlekettik opera jáne balet teatrynyń simfoniialyq orkestriniń artisteri kórermenderge «Jyr alyby - Jambyl» atty teatrlandyrylǵan qoiylymyn usyndy. Uly aqynnyń baǵa jetpes murasyn, ózindik ereksheligi men darynyn ashyp kórsetetin ádebi-mýzykalyq kompozitsiiada onyń ataqty aitystary men áigili «Keń baitaq Qazaqstanym», «Aqyndarǵa arnaý», «Kúláshqa», «Leningradtyq órenim!» jáne t.b. shyǵarmalary oqyldy», - dep habarlady Mádeniet jáne sport ministrliginiń baspasóz qyzmeti.
Merekelik baǵdarlamada Qurmanǵazy atyndaǵy Qazaq ulttyq halyq aspaptary orkestriniń, N.Tilendiev atyndaǵy «Otyrar sazy» Akademiialyq folklorlyq-etnografiialyq orkestriniń, «Jastar» teatrynyń, «Astana Balet» teatrynyń artisteri, «Qorqyt» etno-ansambliniń, «Qulansaz» folklorlyq-etnografiialyq ansambliniń, K.Ázirbaev atyndaǵy Jambyl oblystyq filarmoniiasynyń, «Akak» komýzshylar ansambliniń (Qyrǵyzstan) jeke oryndaýshylary óner kórsetti. Ataqty aqynnyń mereitoiyna Qazaqstan halyqtary Assambleiasy etnomádeni birlestikteriniń artisteri, «Nomad» balalar horeografiialyq ansambli, «Vainah» sheshen-ingýsh halyq ansambli jáne t. b. óz shyǵarmalaryn arnady.
QR mádeniet jáne sport ministri Aqtoty Raiymqulova saltanatty ashylýda baiandama jasady.
«Qadirli ziialy qaýym! Jambyl qazaq ádebieti men mádenietinde erekshe orny bar Alataýdai asqaq tulǵa. Jyl dúldúli, epik aqyn retinde qazaqtyń sýyryp salma improvizatorlyq ónerin biik shyńǵa shyǵardy. Tól ónerimiz aitystyń ereksheligi sóz tapqyrlyq emes, batyldyq, ótkirlik, shyndyqqa toly kórkem beineli sózder tabylyp, qalyń jurtqa qoǵamdyq máseleni aiqyn jetkize alýymen qundy. Jambyl aitysy árdaiym tereńdigimen, kórkemdigimen, tarihi negizderimen astarly mazmunymen jurtty baýrap alǵan edi», - dedi ministr óz baiandamasynda.
Aita keteiik, Qazaqstan Respýblikasynyń Memlekettik hatshysy, mereitoidyń memlekettik komissiiasynyń tóraǵasy Qyrymbek Kósherbaev elordadaǵy Jambyl eskertkishine gúl shoqtaryn qoiǵan edi.
Búgin elimizdegi jáne shet elderdegi qalalar men eldimekenderde Jambyl Jabaevtyń eskertkishteri men biýstterine gúl shoqtary qoiyldy, árqily mádeni sharalar ótkizildi.
Saltanatty sharaǵa Almaty oblysynan Jambyldyń tikelei urpaǵy, nemeresi Saltanat Jambylova kelgen edi.
