Elordanyń sáýlet, qala qurylysy jáne jer qatynastary basqarmasy jaqynda shaharda paidalanýǵa beriletin jańa nysandar týraly málimet jariialady, dep habarlaidy "Ult aqparat".
«Olar elorda úshin mańyzdy nysandar jáne osy nysandar boiynsha qurylys jumystary toqtaýsyz júrip jatyr. Degenmen pandemiia kóptegen salalardyń jumysyn baiaýlatsa da, qurylys baǵytynda qajetti sharalar qabyldandy», - dedi elordanyń Sáýlet, qala qurylysy jáne jer qatynastary basqarmasynyń basshysy Nurlan Ýranhaev.
Atap aitqanda, Turan dańǵyly jáne №26 men E51 kósheleri qiylysynda jeńil atletikalyq sport kesheni paida bolady. Salynyp jatqan bul manej 7 000 kórermenge eseptelgen. Nysan jobasy boiynsha onda jeńil atletikadan álemdik deńgeidegi jarystardy ótkizýge bolady.
Ǵimaratta barlyq infraqurylym qamtylmaq, onyń ishinde jeke qonaq úi de jasaqtalady. Jer telimi 9,0843 gektar aýmaqty alyp jatyr. Nysandy paidalanýǵa berý merzimi 2020 jyldyń 3 toqsanyna belgilengen.
23-15 kóshesi boiynda, iaǵni Baitursynov pen Nájimedenov kósheleri aralyǵynda Qazaq drama teatrynyń ǵimaraty paida bolady. Nysannyń jalpy aýdany 22853,0 sharshy metr shamasynda. Úlken zal 640 orynǵa, al kishi zal 202 orynǵa arnalǵan. Ǵimarattyń qurylysy biyl úshinshi toqsanda aiaqtalady dep kútilýde.
Qabanbai batyr men Máńgilik El dańǵyldarynyń arasynda jańa meshit salynýda. Respýblika men Ortalyq Aziiadaǵy eń úlken meshittiń qurylysy QR Tuńǵysh Prezidenti - Elbasy Nursultan Nazarbaevtyń tapsyrmasyna sáikes júrgizilip jatyr.
Meshit 30 myń adamǵa eseptelgen. Meshit munaralary - 130 metr. Qurylys jumystary 2021 jyly aiaqtalady dep josparlanýda.
