Elordada apta saiyn ekpe alǵandar arasynda baǵaly syilyqtar oinatylady, dep habarlaidy "Ult aqparat" qala ákimdiginiń resmi saityna silteme jasap.
Taǵy bes iPhone 12 jáne basqa da baǵaly syilyqtardyń besinshi utys oiyny 7 tamyzda (senbi) Nur-Sultan qalasy ákimdiginiń áleýmettik jelilerdegi (Facebook, YouTube) paraqshalarynda tikelei efirde ótedi. Besinshi utys oiynyna 31 shilde men 6 tamyz aralyǵynda (qosa alǵanda) vaktsina alǵandar qatysady. Utys oiynyna bailanysty qujat toltyryp, tirkelýdiń qajeti joq.
Qala ákimdigi demeýshiler esebinen baǵaly syilyqtardyń utys oiyndaryn apta saiyn ótkizedi.
Osy aptalyq utys oiynynan basqa, 28 shilde men 6 tamyz aralyǵynda (qosa alǵanda) vaktsinatsiialanǵandar arasynda úsh iPhone12 oinatylady. Atalǵan utys oiynyna «Ábý Dabi Plaza», «Kerýen», «Saryarqa» saýda keshenderinde jáne olarǵa bekitilgen BMSK uiymdarynda – №2, 9 jáne 14 qalalyq emhanalarda vaktsina alǵandar qatysady. Bul utys oiynynyń tikelei efiri 7 tamyzda ótedi.
Birge (https://birge-elorda.kz/nur-sultan) platformasynda utys oiynynyń jeńimpazdaryn anyqtaý úshin arnaiy randomaizer servisi ornatylǵan. Ony ázirleýge IT-qaýymdastyq qatysty. Ekpe alǵandar boiynsha servis QR Densaýlyq saqtaý ministrliginiń aqparattyq júiesimen biriktirilgen.
Aita keteiik, elordada azamattardy vaktsinatsiialaýǵa yntalandyrý maqsatynda baǵaly syilyqtar oinatylady.
Ekpe alǵandardyń arasynda eki bólmeli páter oinatylady. Osy jyldyń 25 maýsymy men 31 tamyzy aralyǵynda vaktsinanyń birinshi komponentin alǵan 18 jastan asqan qala turǵyndarynyń elordada jyljymaityn múlikti utyp alý múmkindigi bar. Aita ketý kerek, utys oiyndary demeýshilerdiń kómegimen ótkiziledi.
Sondai-aq «MEGA Silk Way» SOO vaktsinatsiia pýnktinde birinshi komponentpen vaktsinalanǵandar arasynda avtomobildiń utys oiyny jariialandy.
Elordada ótkiziletin utys oiyndary azamattardy vaktsina alýǵa yntalandyrý, osylaisha olar óz densaýlyǵyn, jaqyn jáne ainalasyndaǵy adamdardyń densaýlyǵyn saqtaitynyn túsinýi úshin uiymdastyrylady. Óitkeni, basty maqsat — ujymdyq immýnitetti qalyptastyrý jáne qalypty rejimge oralý. Ujymdyq immýnitettiń úlesi 60%-dan asýy kerek.
