Elordada 2 tamyzdan bastap jańa karantindik shekteýler kúshine endi. Qalanyń bas memlekettik-sanitarlyq dárigeriniń qaýlysyna sáikes koronavirýsqa qarsy vaktsina almaǵan jekelegen uiymdar men nysandardyń qyzmetkerlerine (turaqty meditsinalyq qarsy kórsetilimderi bar jáne sońǵy 3 ai ishinde KVI-men aýyrǵandardy qospaǵanda) tikelei jumys ornynda eńbek etýine shekteý engiziledi, dep habarlaidy "Ult aqparat" Nur-Sultan ákimdigine silteme jasap.
Olardyń ishinde: halyqqa qyzmet kórsetý nysandary, memlekettik organdar men uiymdar, óndiristik nysandar, qurylys, kóterme jáne bólshek saýda nysandary, mádeniet jáne demalys nysandary, qonaq úiler, áýejailar, vokzaldar, bilim berý jáne tárbieleý uiymdary, densaýlyq saqtaý, sanatoriiler, kóńil kóterý oryndary, dárihanalar jáne taǵy basqalary.
Budan bólek, memlekettik organdar, keńseler, ulttyq kompaniialar men ózge de uiymdar qyzmetkerleriniń 80% qashyqtan jumys isteý formatyna aýystyrylýy tiis. Aita keteiik, sońǵy 3 ai ishinde vaktsinalanǵan jáne aýyryp jazylǵan adamdar úshin bul talap qoldanylmaidy.
Bas sanitarlyq dárigerdiń qaýlysyna sáikes, 2021 jylǵy 10 tamyzǵa deiin qyzmetkerlerdi koronavirýsqa qarsy vaktsinanyń birinshi komponentimen, al 2021 jylǵy 1 qyrkúiekke deiin ekinshi komponentpen (sońǵy 3 ai ishinde turaqty meditsinalyq qarsy kórsetilimderi bar jáne COVID-19 infektsiiasymen aýyryp jazylǵan adamdardy qospaǵanda) egýdi uiymdastyrý qajet.
Nur-Sultanda shekteý jáne karantindik sharalardy kúsheitý týraly qaýly QR aýmaǵynda koronavirýs infektsiiasynyń paida bolýy men taralýyna jol bermeý jónindegi vedomstvoaralyq komissiia otyrysynyń hattamasyna sáikes qabyldandy.
