Elordada qurylys alańynan mys kabel urlap, satýmen ainalysty degen kúdikpen aǵaiyndy úsh jigit ustaldy. Bul jaiynda Nur-Sultan qalalyq politsiia departamentinen málim etti, dep habarlaidy "Ult aqparat".
«Bireýi 18 jáne ekeýi 21 jastaǵy úsh aǵaiyndy jigit qurylys alańynda aýysymmen qara jumysshy bolyp eńbek etken. Kompaniia usynǵan jataqhananyń bir bólmesinde turǵan. Urlyq jasaýdy oiǵa alǵan olar toptaryna 18 jastaǵy bir áriptesterin qosyp alǵan. Túngi aýysym kezinde toptyń 2 múshesi qurylys alańynan mys kabel jinaýmen ainalysqan. Al dál osy ýaqytta qalǵan eki kúdikti nysanǵa jaqyn jerge kólikterimen kelip, kútken. Olar qorshaýdan sybailastary mys kabelderin laqtyrǵan kezde, ony kólikterin tiep, oqiǵa ornynan boi tasalap otyrǵan. Kelesi kúni urlanǵan kabelderdi metall qabyldaityn pýnktterge satyp jiberip, túsken aqshany ózara bólisip, qajetterine jaratqan», - dep atap ótedi departamentten.
Vedomstvo málimetinshe, jeńil jolmen aqsha tabýdyń dámin tatqandardyń taǵy da bir ret kabel urlaǵandary belgili bolyp otyr. Shyǵynnyń jalpy somasy 960 myń teńgeni quraidy. Politsiia qyzmetkerleri jedel izdestirý is-sharalary barysynda urlyq jasaý kúdigimen 4 jumysshyny ustady. Olar kinálaryn moiyndap, zattai aiǵaqtar tárkilengen.
Qazirgi ýaqytta kúdiktilerdiń qala aýmaǵynda jasalǵan dál osyndai qylmystarǵa qatysy tekserilip jatyr.
