Naýryz meiramynda ulttyq qundylyqtardy dáriptep júrgen jandarǵa «Naýryz syilyǵy» tabys etiledi, dep habarlaidy QazAqparat tilshisi.
«25 naýryzda Nur-Sultan qalasy ákimdiginiń uiymdastyrýymen byltyrdan beri júzege asyrylyp kele jatqan «Naýryz syilyǵy» ulttyq syilyǵy tabystalady. Atalǵan joba tek mádenietti ǵana emes, sonymen birge ulttyq bailyqtyń barlyq alýan túrliligin bildiretin halyq sheberlerine arnalǵan», - dedi QR Mádeniet jáne sport vitse-ministri Nurǵisa Dáýeshov OKQ-de ótken baspasóz máslihatynda.
Uiymdastyrýshylardyń aitýynsha, ulttyq syilyq 8 nominatsiia boiynsha tabys etiledi. Búginde jeńimpazdardyń aty-jóni belgili.
Odan bólek, vitse-ministr Naýryz meiramy kúnderi elimizdiń barlyq aýmaǵynda kótpegen buqaralyq-mádeni is-sharanyń ótetinin aitty.
«Kópshiliktiń qatysýymen túrli deńgeidegi mádeni, sporttyq ulttyq is-sharalar, aitystar, kontserttik baǵdarlamalar, kórmeler, qazaq halyq aspaptar festivalderi ótedi. Sonymen qatar túrli baiqaýlar, teatrlandyrylǵan qoiylymdar, chellenjder, sherýler, kezdesýler, saiystar, uly tulǵalardyń mereitoilaryna arnalǵan konferentsiialar, qolóner kórmeleri uiymdastyrylmaq. Odan bólek, ulttyq tamaq, ulttyq oiyn, kúres, arqan tartý, asyq atý, toǵyzqumalaq, qol kúres, atalardyń, ájelerdiń baiqaýy bolady», - deidi ol.
