Elordada politsiia qyzmetkerleri «Jasóspirim» aldyn alý is-sharasy aiasynda nashar otbasylarǵa qatysty reid júrgizip jatyr, dep habarlaidy QazAqparat.
Qalalyq politsiia departamentiniń málimetinshe, kámeletke tolmaǵandar isi jónindegi inspektorlardyń jumysy balalar men jasóspirimder arasyndaǵy quqyqbuzýshylyqtyń aldyn alýmen ǵana shektelmeidi. Olarǵa balalar men jasóspirimderdiń ata-analarmen de jumys isteý júktelgen.
«Ókinishke orai ata-analardyń barlyǵy birdei balalaryn tárbieleý isimen laiyqty deńgeide ainalyspaidy. Ishimdikke nemese esirtkige elitý, beiádep qylyq tanytý, balalarǵa dórekilik kórsetý syndy jat qylyqtardyń oryn alý faktileri bar. Munyń barlyǵy da kámeletke tolmaǵandardy tárbileý isine teris áserin tigizýi múmkin», - dep atap ótedi departamentten.
Al Nur-Sultan qalalyq PD iývenaldy politsiia bóliminiń bastyǵy Nellia Dosjanova «politsiia árbir bala otbasynda ómir súrýi tiis!» degen ustanymmen jumys isteitindigin aitady.
«Bizdiń mindetimiz – tárbie berýden jaltaranatyn áke men anany túzetýge barynsha múmkin is-sharany qabyldaý. Ókinishke orai, kez kelgen jaǵdaida jumys áńgimelesimen jáne turǵylyqty jerdi tekserýmen aiaqtala bermeidi. Mundai jaitta biz ata-ana quqyǵyn shekteý nemese aiyrý týraly máseleni kóterý arqyly jaýapkershilikke tartýǵa májbúrmiz», - dedi ol.
Departament málimetinshe, elordada quqyq qorǵaý organdarynyń esebinde shamamen 200 otbasy tirkeýge alynǵan. Bul otbasylarda 425 kámeletke tolmaǵan bala tárbielenýde. Jyl basynan beri 2 azamat ata-ana quqyǵynan aiyrylsa, 7 adamnyń ata-ana quqyǵy shektelip otyr. Jalpy elordada ata-ananyń bala tálim-tárbiesine nemquraily qaraityndyǵyna qatysty faktiler de jiilep tur.
«Máselen, 15 qyrkúiek kúni túngi saǵat 2-de 102 nómirine habarlasqan qala turǵyny Ýálihanov kóshesinde jol boiynda eki balanyń júrgeni týraly habarlady. 3 jáne 5 jastaǵy sábiler Ómirlik qiyn jaǵdaiǵa tap bolǵan balalardy qoldaý ortalyǵyna ornalastyryldy. Quqyq qorǵaýshylar sábilerdiń úide jalǵyz bolǵanyn jáne óz betterinshe júrgenin anyqtady. Olar túngi saǵat 2-de úiden shyǵyp ketip, jol boiynda júrgen. Al dál osy ýaqytta olardyń ata-analary kórshileriniń úiinde ishimdik iship otyrǵan. Politsiia qyzmetkerleri olardyń analaryna qatysty QR ÁQBtK 127-babymen ákimshilik hattama toldyrdy. Otbasy iývenaldy politsiia baqylaýyna alyndy. Qazirgi ýaqytta kámeletke tolmaǵan balalardyń analaryna qatysty ata-ana quqyǵynan aiyrý nemese shekteý máselesin qarastyrý úshin qujattar jinalyp jatyr», - dep atap ótedi departamentten.
