Nur-Sultan qalasynda tótenshe jaǵdai erejesine baǵynbaǵan 200 adam jaýapkershilikke tartyldy. Bul týraly Nur-Sultan qalasy politsiia departamentiniń basshysy, elordanyń komendanty Erjan Sádenov málim etti, dep habarlaidy QazAqparat.
«Qurmetti qala turǵyndary, elordada ahýal turaqty. Táýlik ishinde 8 qylmys tirkeldi. 83 jol-kólik oqiǵasy bolyp, saldarynan 2 adam jaraqat aldy. Sol siiaqty 464 ákimshilik quqyqbuzýshylyq anyqtaldy. Onyń ishinde 183 - qalada turý erejesin buzý boiynsha, 36 - qoǵamdyq orynda ishimdik ishý jáne kóshi-qon erejesin buzý boiynsha 18 derek tirkeldi», - dedi Erjan Sádenov Facebook paraqshasynda.
Onyń aitýynsha, elorda aýmaǵynda 6 blok-beket ornatylyp, tártip saqshylary qala qaýipsizdigin qamtamasyz etip tur.
«Tótenshe jaǵdai rejimin buzǵan 200 adam jaýapqa tartyldy. Atap aitqanda, 28 turǵyn ákimshilik qamaýǵa alyndy», - deidi ol.
