Elordada tisin emdetken balany es-tússiz halge túsirgen tis emhanasyna tekserý júrgizildi. Onyń qorytyndysyn QR Densaýlyq saqtaý ministrligi Taýarlar men qyzmetterdiń sapasy men qaýipsizdigin baqylaý komiteti tóraǵasynyń orynbasary Laýra Ahmetniiazova jariia etti, – dep habarlaidy QazAqparat.
«Keshe tekserýdi aiaqtadyq. Nátijesinde birneshe zańbuzýshylyqty anyqtadyq. Olardyń bastylary – Sevoflýran preparatymen jasalǵan jalpy anesteziiaǵa qosa, 4 jasqa deiingi balalarǵa egýge bolmaityn, Mepivastezin jergilikti anesteziia preparaty qoldanylǵan» dedi ol búgin ótken brifingte.
Sonymen qatar onyń aitýynsha, balany emdemesten buryn allergiiaǵa qarsy synama da alynbaǵan. Anesteziolog-reanimatolog dáriger jalpy narkoz berýge 15 minýt qalǵanda ǵana balany teksergen. Al standartqa sáikes dáriger patsientti boljaldy ota jasalatyn sátten keminde 24 saǵat buryn qaraýy tiis.
«Komissiia qorytyndysy boiynsha patsient jaǵdaiynyń nasharlaýy egilgen preparattardyń birine anafilaktikalyq shoktyń damýymen bailanysty bolýy barynsha yqtimal» dedi Laýra Ahmetniiazova.
