Búgin Nur-Sultan qalasynyń ákimdiginde astanalyq jarnama agenttigi ókilderiniń qatysýymen kezdesý ótti, dep habarlaidy "Ult aqparat" ákimdiktiń baspasóz qyzmetine silteme jasap.
«Qazirgi ýaqytta Nur-Sultan qalasynda 2 myńnan astam jarnama qurylymy bar. Olardyń qataryna bilbord, afisha, LED ekran, aialdama kesheni kiredi. Naqtyraq aitsam, qalada 95 LED ekran bar. Bir ókinishtisi, sońǵy ýaqytta zańsyz nemese tiisti organdardan kelisim almai ilingen jarnamalar kóbeiip barady», – dedi oǵamdyq damý isteri basqarmasynyń basshysy Talǵat Rahmanberdi.
Kezdesý barysynda sóz alǵan Onomastikalyq jumys jáne memlekettik rámizder bóliminiń basshysy Gúljan Qurmanǵaliqyzy zańsyz ári qatege toly jarnamalar úshin aldaǵy ýaqytta salynatyn aiyppul týraly túsindirip berdi.
«Biz jarnama agenttikteri bergen mátindi tekserip, kelisim beremiz. Ákimshilik-quqyqbuzýshylyq kodeksiniń 455-babyna sáikes aiyppul salý isi qarastyrylǵan. Atalǵan baptyń 3-tarmaǵy boiynsha jarnama taratý tiline belgilengen talapty buzǵany úshin jeke tulǵalarǵa 20 AEK, laýazymdy tulǵalarǵa 70 AEK, shaǵyn kásipkerlik sýbektilerine nemese kommertsiialyq uiymdarǵa 100 AEK, orta kásipkerlik sýbektilerine 150 AEK, al iri kásipkerlik sýbektilerine 400 AEK kóleminde aiyppul salynady. Osyǵan orai Til týraly zańnyń 21-babyna sáikes kez kelgen aqparat (onyń ishine jarnama da kiredi) memlekettik tilde jáne orys tilinde bolýy tiis», – dep Gúljan Qurmanǵaliqyzy jarnama agenttiginiń ókilderine eskertý jasady. Jiyn barysynda sóz alǵan qalalyq Politsiia departamenti Esirtki qylmysyna qarsy is-qimyl basqarmasynyń bólim bastyǵy Sergei Ilinyh sońǵy ýaqytta jarnama bilbordtary arqyly esirtki saýdasy jarnamalanyp ketkenin jetkizdi.
«Esirtki biznesi óz qylmysyn taratý úshin aqparattyq tehnologiiany qoldanýda. Osy maqsatta internet resýrstaryn, túrli messendjerlerdi paidalanady», – deidi Sergei Ilinyh.
Onyń aitýynsha, 2019 jyldyń 27 jeltoqsanynan bastap arnaiy zań jobasy engizilgen, onyń negizinde esirtki nemese soǵan uqsas ónimdi nasihattaǵan, jarnamalaǵan azamat úsh jylǵa deiin, al BAQ betterinde nemese ózge de quraldarda jariialaǵanǵa 6 jylǵa deiin bas bostandyǵynan aiyrý jazasy qarastyrylǵan.
Basqosýda Qoǵamdyq damý isteri basqarmasynyń basshysy Talǵat Rahmanberdi jarnama agenttikterine 2020 jyldyń 3 naýryzyna deiin jarnama nysanynyń estetikalyq túrin qalpyna keltirý, sondai-aq, «Jarnama týraly», «Til týraly» zańdardy, QR basqa da normativtik aktilerin saqtaý kerektigin aityp ótti.
