Elorda Uly Jeńistiń mereitoiy qarsańynda túrlene tústi, 9 mamyr kúni Uly Jeńistiń 75 jyldyǵy ólsheýsiz dańqtyń, óshpes qaharmandyq erliktiń, halqymyzdyń sheksiz, muqalmas qairatynyń merekesi retinde atap ótiledi, dep habarlaidy QazAqparat.
Uly Jeńis kúni beibitshilikti súigish barsha adamzattyń merekesi. Búgingi jeńimpaz urpaqtyń balalary men nemereleri úshin jarqyn da qasietti mereke. Qala kóshelerinde ádettegidei halyq kóp emes, degenmen elorda úlken mereke qarsańynda ekeni ańǵarylady.
Merekelik rámizder barlyq jerde: jalaýshalar men Jeńis kúniniń belgileri jazylǵan kóptegen plakattar ilinip, aialdama pavilondarynda Otan qorǵaýshylar kúnimen jáne 9 mamyr merekesimen quttyqtaýlar ilýli tur.
Sońǵy jyldary qalyptasqan dástúr boiynsha, ortalyq dańǵyldardyń boiynda ekinshi dúniejúzilik soǵysynyń batyrlary beinelengen bilbordtar ilingen. Qazir kózi tiri qyryq tórt soǵys ardageri bar. Olardyń eń jasy toqsannan asqan. Soǵys jyldary sol kezdegi Aqmola oblysynan 14 723 adam attanyp, olardyń jartysyna jýyǵy maidan dalasynda qaza tapty. Bizdiń atalarymyz shaiqasta teńdesi joq erlikterimen erekshelenip, 44 jaýynger Sovet Odaǵynyń Batyry ataǵyna ie boldy. Eki márte Keńes Odaǵynyń Batyry, ushqysh Talǵat Begeldinov, Sovet Odaǵynyń Batyry, táýelsiz Qazaqstannyń birinshi qorǵanys ministri Saǵadat Nurmaǵambetov, Reihstag ústinde Jeńis týyn kótergen alǵashqy Halyq Qaharmany Raqymjan Qoshqarbaevtar Saryarqa dańqyn búkil álemge jaidy. Solardyń jáne basqa maidangerlerdiń, sondai-aq tyl eńbekkerleriniń estelikteri keshe ǵana jaryq kórgen «Uly Jeńis eshqashan umytylmaidy» kitabynda jinaqtalǵan. Jeńistiń 75 jyldyǵy otshashý, saltanatty sherýlersiz ótedi. Biz bul qasietti merekeni úide, otbasynda atap ótip, bizge beibit aspan syilaǵan ákelerimizdi, atalarymyzdy eske alamyz.
