Elordada «Shámshi» miýzikliniń premerasy ótti, dep habarlaidy "Ult aqparat" Mýzykalyq jas kórermen teatrynyń baspasóz qyzmetine silteme jasap.
1 naýryz kúni Qazaqstan Respýblikasy Táýelsizdiginiń 30 jyldyǵyna orai qazaqtyń kompozitory Shámshi Qaldaiaqovtyń ómiri men shyǵarmashylyǵynan kórinis beretin «Shámshi» miýzikliniń premerasy ótti. Avtory – Mádina Omarova, qoiýshy rejisseri – Qazaqstannyń eńbek sińirgen qairatkeri Ashat Maemirov, rejisserdiń assistenti – Mekan Djýmabaev.
«Qoiylymnyń tusaýkeseri 1 naýryz – Alǵys aitý kúnimen tuspa-tus kelgendikten teatr ujymy qoǵamda paidaly ári igi ispen ainalysyp júrgen volonterlerdiń eńbegin eleýdi jón kórdi. Olarǵa alǵys bildirý maqsatynda spektaklge elordamyzdyń 30-ǵa jýyq jas volonterleri arnaiy shaqyryldy», delingen habarlamada.
Teatr direktory, Qazaqstannyń eńbek sińirgen qairatkeri Ashat Maemirov: «Qiyn kezeńde kómek berip, memlekettiń kóterip jatqan úlken júgine aralasyp, teńizge tamǵan tamshydai bolsa da, úlken eńbek etkenderińiz úshin myń alǵys! Búgingi mereke qutty bolsyn!» - dep premerany alǵyspen bastady.
Qoiylym belgili tulǵanyń kúresker, ǵashyqtyq jáne kompozitorlyq qyrlaryn kórsetti. Naqtyraq aitqanda, kúresker Shámshiniń rólin Aman Ǵumarov, kompozitor Shámshiniń rólin Sultan Keńshilik, ǵashyq Shámshiniń rólin Salamat Muqashev somdady. Úsh akter sahna aldynda kompozitordyń ómir jolynda kezikken qiyndyqtaryn, adam men qoǵamǵa degen filosofiiasyn, ishki jan dúniesindegi tolqyǵan sezim iirimderin, ǵashyqtyq syrlaryn áýezdi ánder arqyly kórermenderge jetkize bildi. Sonymen qatar qonaqtar miýziklde Muqaǵali Maqataev, Roza Baǵlanova, Ábilahat Espaev, Tólegen Aibergenov, Jumeken Nájimedenov, Aqan seri syndy tulǵalardyń beinelerin kezdestirip, olar Shámshiniń ónerin qalai qoldap, shyńdala túsýine qandai septigin tigizgenderine kýá boldy.
Mýzykalyq jas kórermen teatry «Shámshi» miýzikli arqyly óner jolyna qyzyǵýshylyqpen qaraityn daryndy jasóspirimder men balalardyń qiialyn qozǵap, olardy ónerge qyzyqtyryp, qanattandyrdy. Qoiylymdy tamashalaǵan jas kórermen Shámshige qarap, onyń shyǵarmashylyǵyna zer salyp, kúrdeli ómir jolyndaǵy kieli ónerdiń baǵasy adamzat ǵumyryn arnaýǵa turatyndai qudiretti de taza ekendigine kóz jetkizdi.
Teatrdaǵy Kameralyq orkestrdiń súiemeldeýimen ótken spektaklde uly kompozitordyń 15-ke jýyq ánderi oryndaldy. «Jan aǵa», «Arys jaǵasynda», «Ánim sen ediń», «Qaiyqta», «Ómir ózen», «Baqyt qushaǵynda», «Saǵynyshym meniń», «Qýanysh valsi», «Aq mańdailym», «Syǵan áni», «Aqan Seri», «Ana týraly jyr», t.b. ánderi kórermenniń kóńilin baýrap, júrek túkpirindegi meiirimi men mahabbatyn oiata tústi.
Qala turǵyndary men qonaqtary «Shámshi» miýziklin 2, 3 naýryz kúnderi tamashalai alady.
