27 sáýirden bastap Nur-Sultan qalasynyń turǵyndary men qonaqtaryna aýlada serýendeýge jáne saiajaidaǵy óz ýchaskelerine barýǵa ruqsat etiledi. Osyǵan bailanysty azamattarǵa qoiylatyn talaptar týraly qala ákimi orynbasary Baqtiiar Maken túsindirdi, dep habarlaidy elorda ákimdiginiń resmi saity.
«Azamattar úi aýlasynda serýendeý úshin naqty bir sharttar men shekteýlerdi oryndaýy qajet. Atap aitsaq, kóshede otbasy múshelerin qospaǵanda, úsh adamnan kóp top bolyp jinalýǵa tyiym salynady. Kámeletke tolmaǵan balalar ata-analarynyń nemese 18 jasqa tolǵan týystarynsyz aýlada júrýine ruqsat etilmeidi. Aýlada serýendep júrgen azamattar meditsinalyq maska men qolǵap kiiýi kerek. Tek naqty turǵylyqty meken-jaidyń aýlasynda bolýy shart. Kóshede júrýge 06.00-den 20.00-ge deiin ruqsat etiledi», – dedi B.Maken ortalyq kommýnikatsiialar qyzmetinde ótken brifingte.
Egde jastaǵy (65 jastan joǵary) jáne sozylmaly aýrýlary bar adamdar, asa qajettilik bolmasa syrtqa shyqpaǵany durys. Óitkeni bul sanattaǵy adamdardyń Covid-19 infektsisymen aýyrý yqtimaldyǵy joǵary.
Sondai-aq saiajai ýchaskeleriniń ieleri de karantin aimaǵynan shyǵý úshin birqatar sharttardy saqtaýy tiis. Olar: karantin aimaǵynda 06:00-den 20:00-ge deiin jeke kólikpen júrý, memlekettik mór qoiylǵan baý-baqsha seriktestigine múshelik kitapshasynyń nemese jer ýchaskesiniń maqsatty taǵaiyndamasynyń memlekettik akt kóshirmesiniń bolýy. 65 jastan asqan egde adamdar baý-baqsha alańdaryna barmaýy qajet. Al, kámeletke tolmaǵan balalarǵa ata-anasy nemese 18 jasqa tolǵan týystarynsyz saiajaiǵa barýǵa ruqsat etilmeidi.
Aita ketsek, qalada 20 myńnan astam adam turatyn 64 baǵbandyq birlestik bar.
